Zaninah Barca, Atletico leh Real inlan dawn

Spanish football-a ngaihnawm zel a, season dang ang lo takin season ṭantir aṭangin team tin an intluk tawk. 

Hmahruaitu Barcelona leh parukna Real Sociedad inkarah point thum chauh a awm - hei hi club lian tia hriat lar Barcelona, Real Madrid leh Atletico Madrid-ten beisei an phak loh vang a ni. Mahse, tun hnaiah Barca leh Real an insiamṭha a, Atletico erawh 'draw uar team' tia an sawina lak ata an la tal chhuak hleithei lo. 

Zanin dar 8:30-ah Levante lenchilhin Barca an inlan dawn a, zan dar 11:00-a Atletico-in Sevilla an lenchilh tur hi en châkawm a tling - dar 1:30-ah Real Madrid-in Real Betis an mikhual thung ang. 

Season ṭantirah hliam vangin Lionel Messi a inlan mumal thei lo a, Barcelona-in beisei angin season bul an ṭan thei lo bawk. Mahse, Messi dam chian hnuah hmuh theihin Barca an kang awk awk a, match hnuhnung bera 5-1 a Real Valladolid an hnehna inkhelah Messi hian goal hnih khungin assist vawi hnih a nei!

Argentine forward dam chiang ta hi Barca tan a lawmawm dan a awm - Luis Suarez a ti ṭha tel tlat! Uruguayan striker hian Messi a ṭhatpui tih hai rual a ni lo a, striker pahnih hian an match hnuhnung pangaah goal nga ve ve an khung tawh. 

Levante tan khawvela tlarhma inkawp hlauhawm ber pawlin ngai an awh leh ta hi thil hmuh nuam a niin a rinawm lo a, Antoine Griezmann a la awm tel cheu bawk avangin an tan a harsa ang. 

Real Madrid ban hnu Julen Lopetegui enkawlna hnuaiah Sevilla-in season bul an ṭan ṭha a, match 11-ah point 20 neiin Atletico Madrid nen an point hmuh zat a in ang. Atletico tan Sevilla muala inkhelh hi a awlsam lo ang tih a chiang a, Diego Simeone leh a nauten hnehna chan dan an zir thar leh a ngai - an chak loh chuan top four aṭanga petchhuah an ni dawn. 

Madrid khaw club tan hian an thiampuipa Joao Felix, Jose Gimenez leh Stefan Savic te chu hliam vangin an inlan theih a la rinawm lo a, Ningani zing thleng kha chuan club training an la zawm lo.Zanin inkhel tur hi Simeone tan La Liga match 300-a a team a kaihhruaina tur a ni dawn a, an pu match 300-na lawm turin Alvaro Morata a pawimawh ang. Spanish striker hian a match hnuhnung pathumah goal a khung vek. 

Tun season-ah Real Madrid chanchin tluka sawi sual awl a tam lo - result ṭha an neih hnu lawkah result duhawm lo an nei leh ṭhin a, zanina Real Betis an mikhual turah pawh rin ngam an harsa hle. Zinedine Zidane enkawl team hian an match hnuhnung berah 5-0 ngawtin Leganes an sawp a, mahse he team hi 4-2 a Granada an sawp hnu lawka 1-0 a Real Mallorca ngam lotu kha an ni tih hriat tel a ṭha. 

Real tan Gareth Bale chu hliam vangin a inlan theih a rinawm loh a, James Rodriguez chu a nupuiin fa a hrinsak avangin Colombia lamah a awm bawk. Zidane-a tan Karim Benzema a pawimawh leh dawn tihna a ni a, Leganes laka a vawi khat nana goal khungtu Luka Jovic hian a zawna goal khung a chak bawk ang.