Kerala leh Delhi danglamna Belfort

Pathianni zan khan Kerala Blasters chuan Indian Super League semifinal first leg-ah 1-0 in Delhi Dynamos an hneh a, team pahnih danglamna thlentu chu Kervens Belfort a ni. Haiti international hian minute 65-naah he inkhela goal awmchhun hi a khung a, Jawaharlal Nehru Stadium, Kochi-a mipui 50,000 pungkhawm hmaah a team chu hnehna a chanpui.

Delhi Dynamos tan Lalchhawnkima leh Malsawmzuala ten inkhel bul ṭan lo mah se second half-ah tlan luhtir an ni a, Champhai tlangval Kim Kima'n injury time-ah an si phurh sutna hun
ṭha nei hial mah se Aizawl FC defender hlui volley hi goal-ah a chang thei lo a, Delhi-in an vanduai ṭum an tawng.

Dynamos tan Kean Lewis-a'n Kerala tlarhnung a rum ṭhaih fo a, vei lam sirah Marcelinho a hlauhawm tluan chhuak zak bawk - Delhi khawpuia second leg an khelh hunah Kerala tan hna a awlsam dawn lo. Hetihrual hian Kerala lamah CK Vineeth leh Belfort te hmuh hmaih theih an ni bik lo a, Delhi tlarhnung tan vawi tam hna siam saktu an ni.

Zambrotta a tlawm lo

Delhi Dynamos coach Gianluca Zam-brotta chuan, "Kan buaina chu tihsual kan ngah lutuk kha a ni. Kan thuhnuaia game dah turin vawi tam hun kan nei a, mah se kan chhawr ṭangkai lo. Tunah chuan Delhi lam kan thlir a hun leh tawh a, tun aia ṭha zawk hian kan khelh theih ka beisei tlat a ni," tiin a sawi.

Italian legend chuan hmabak êng tak thlirin, "Second leg kan khelmuala kan khelh dawn avangin kan vannei a, kan fan-te hmaa inkhel tur kan nih avangin kan dinhmun a ṭha zawk. Second leg-ah chuan tun aia ṭha zawk hian kan khel ang tih ka chiang a, Kerala hi team ṭha tak an ni tih erawh phat a ṭul lo. An goal neihchhun erawh counter attack aṭanga an khung a ni," tiin chak lo mah se final lut turin dinhmun ṭha zawkah a inngai.

Coppell-a lawm

Kerala Blasters coach Steve Coppell chuan, "Delhi hi team ṭha tak an nih avangin an khelmuala kan inlan hmaa hmahruaitu ni zawk chunga kan inlan tur hi kan vannei takzet a, hun ṭha vawi tam kan insiam theih avang khan ka naute chungah ka lawm takzet a ni," a ti.

Manchester City boss hlui chuan Delhi-a an inkhel tur thlirlawkin, "Tlar-hnung veng ringawt chungin kan khel dawn nge goal khung belh ngei tumin kan khel ang tih chu sawi theih a ni lo. Kan tum ber chu inkhelh a ni mai a, kan ṭhat dan bera kan ngaihin kan khel ang a, enge lo thleng chu kan hre mai ang," tiin a sawi.

Hmabak

ISL semifinal hi two-legged a khelh a ni a, Nilaini zanah Delhi Dynamos hian Kerala hi an lo mikhual ve thung dawn. Inkhel pahnih belhkhawma chak zawk zawk hian December 18-ah final an khel ang.