Everton mikhual tur Arsenal Kan tla thei - Lukaku

Romelu Lukaku chuan thawh--hona ṭha tak nei chunga an insiamṭha lo a nih chuan Everton chu Premier League aṭanga tla thei an nih thu a sawi! Hetihlai hian Arsenal manager Arsene Wenger erawhin season hmasa aia hma an sawn nasat thu a sawi - zanin dar 1:10 hian Goodison Park-ah team boruak inang lo tak pahnih hi an inhmachhawn dawn.

Champion lai Leicester City-in Pep Guardiola enkawl Manchester City 4-2 a an hneh hnuah zanin dar 1:15 vek hian AFC Bournemouth an lenchilh leh dawn bawk - khelh dan rinthiam har leh ngelnghet lo Foxes tan fiahna a ni ang.

Everton an buai

October 30 khan Everton hian West Ham 2-0 in an hneh a, hemi hnuah league match nga khel leh tawhin chak ni hmel an la hmu leh lo. Point 20 hmunin league table-ah pakuana an ni a, hmahruaitu Chelsea an phak lohna chu point 17 lai a ni tawh. Everton hian hliam vangin forward Yannick Bolasie an chhawr thei dawn lo a, Muhamed Besic leh Matthew Pennington te chu khup leh malpui na vangin an chawl mek bawk.

Premier League goal kua khung tawhtu Lukaku chuan, "Kan dinhmun hi a ṭha lo, kan thawhho ṭhat a ngai a, hma kan sawn loh chuan kan tla mai ang! Manager-in a hna ṭha takin a thawk a, player-ten kan mawhphurhna kan hlen ve a ṭul. Hmathlir kan neih a ngai a, chumi thleng tur chuan kan thawhrim a ngai," a ti. Kartawp inkhelah Lukaku hian Watford lakah goal hnih khung mah se 3-2 in an chak lo.

Season hmasa an intawn pa--hnihah Arsenal hian hnehna an chang ve ve. Goodison Park-ah league match bika an intawn hnu-hnung pakuaah Everton hian vawi khat chiah hnehna an chang a, vawi nga chak loin vawi thum an inhnehtawk - Toffees tan fimkur a ṭul.

Gunners manager Wenger chuan, "Season hmasa khan Premier League-ah pahnihna kan ni a, a chhe hran lo. Nikum nena khaikhin chuan kuminah hma kan sawn nasa hle a, a pawimawh ber chu rei tak chhung ṭha tak a khelh theih a ni," tiin a sawi.

Arsenal hi league match bikah chuan a zawnin match 14 chhung hneh lo nei loin an kaltuang mek a, vawi 10 hnehna changin ṭum li dang chu an khingpuite nen an inhnehtawk - an boruak ṭhat lai tak a ni.

Kartawpa Stoke City 3-1 a an hneh ṭumin Shkodran Mus-tafi chu malpui na vangin lakchhuah a ni a, Mathieu De-buchy leh Per Mertesacker te hliam a la dam lo bawk. Mahse, Hector Bellerin a dam leh tawh avangin Wenger-a tan tlarhnungah buaina tur a awm lo ang.

Foxes fiahna

Jamie Vardy-a hattrick hmang-in Man City 4-2 in an hneh a, Foxes tan hrem vanga match khat khel thei lo Danny Drinkwater a lo kir tawh dawn. Goalkeeper Kasper Schmeichel kut hliam la dam lo mah se Claudio Ranieri naute hian inrintawkna an nei sang ang tih a chiang.

Premier League champion Foxes hi tun season-ah hriattham an har hle. Champions League-ah awlsam taka last 16 an lut theih laiin league-ah beisei an phak lo. Point 16 hmuin league table-ah 14-na ni mah se relegation zone-a awm Swansea City nen an inthlauhna chu point li chiah a ni.

An khelh dan ngelnghet lo lutuk vangin Ranieri a mangang a, Porto an hmachhawn ṭumin a player ṭha rual a chawlhtir. Italian manager hian a tisual lo, City lakah a rah an seng nghal - zaninah chhawm nun an duh ngei ang.

Kai thar Eddie Howe-a enkawl Bournemouth hi Burnley FC 3-2 a hneh lo hlim an ni. Liverpool 4-3 a hneh thei Cherries hian hliam vangin Lewis Cook, Junior Stanislas leh Andrew Surman te an la chhawr thei dawn lo.

Club pahnihte hi tun hmain vawi 11 an inhmachhawn tawh a, Foxes hian vawi ruk hnehna changin ṭum hnih an chak lo a, a dang pahnihah an inhnehtawk thung.