India lakah England an zawr

Test series match lina Mumbai-a khelhah India-in inning khat leh run 36-in England an sawp.

December 16, Zir-tawp-ni hian test match hnu-hnung berah Chennai-ah khelh a ni ang a, India hi 3-0 a hma an hruai tawh avang-in series an la chiang tawh.

England-in an bat hma-sa a, Keaton Jen-nings-a'n ram tana a khelhna hmasa berah run 112 a vaw chhuak. Amaherawhchu Indian bowler Ravichandran Ashwin-a'n wicket ruk zet lain run 400-ah an all out.

India bat hun a thleng a, Murali Vijay-a'n run 136 a siam bakah skipper Virat Kohli-a'n run 235 zet vaw chhuakin mualneitu hian run 631 an siam.

England tan inning hmasa zawka century siam thei Jennings a duck out a, Joe Root (77 runs) leh Jonny Bairstow (51 runs) ten half century siam mah se run 195-ah a out fai vek.

Nimina ni hnuhnung ber khelhah Indian bowler Ashwin-a'n wicket li zet a la a, Tamil bowler hian innings pahnihah wicket 12 lain run 167 a pe a, India chakna kawngah player pawimawh a ni. Man of the match atan erawh run 235 zet siamtu captain Kohli thlan a ni thung.