Rosberg a ropui lo - Ecclestone

Formula 1 chief executive Bernie Ecclestone chuan Nico Ros-berg chu world champion pakhat ve mai a nih thu leh khawvela motor intlansiakna lian leh sang bera driver ropui leh sulhnu nei ṭha bikte zinga chhiar tel theih a nih loh thu a sawi chhuak.

German driver Rosberg hian Mercedes car a khalh chhungin November 27 khan Abu Dhabi Grand Prix-ah hnehna a chang a, a vawi khat nan Formula 1 world champion a ni. Kum 31-a upa Rosberg-a'n champion nomawi a chawi aṭanga ni nga hnu lekah he inelna hi a chawlhsan thu a puang a, a thutlukna avang hian mi tam takin 'fing' an tih laiin 'atthlak' titu pawh an tam hle.

Formula 1 sawi rik a nih ruala a hming rawn lang tel nghal ṭhin, kum 1978 aṭanga Formula One Constructors Association chief executive ni tawh Ecclestone pawh Rosberg chungchangah a ngawi bik lo. Tunlai driver langsar Sebastian Vettel, Fernando Alonso leh Lewis Hamilton te huanga seng luh ngawt a theih loh thu a sawi.

Kum 86-a upa Ecclestone chuan, "Rosberg hi world champion a ni a, thil dang a awm lem lo. He inelna huanga driver ṭha bikte hi chu vawi khat aia tam an champion thei, ani erawh a hlawhtlin hnuah hnunglam a hawi zui daih," a ti.

British driver Hamilton hi world champion vawi thum a ni tawh a, Red Bull car khalh chungin Vettel hi kum li chhung zet chu khawvela a ṭha ber a lo ni tawh bawk - McLaren driver Alonso pawh tun hnaiah tla hniam mah se world champion vawi hnih a ni tawh.

Sumdawng hausa tawntaw Ecclestone chuan, "A chunga driver tarlan pathumte huanga Rosberg hi ziah luh theih a ni lo," a ti. British pachal Ecclestone hi Formula 1 chauh ni loin infiamna khawvelah a inrawlh ve fo a, kum 2007-2011 chhung khan Flavio Briatore nena inkawpin Queens Park Rangers (QPR) neitu an lo ni tawh.

Tu nge Rosberg?

June 27, 1985 khan Wiesbaden, West Germany-ah a piang a, a pa hi Formula 1 world champion Keke Rosberg a nih avangin a naupan lai aṭangin motor intlansiak chu a thisenah a tel nghal. Keke-a'n 1985 Detroit Grand Prix-a hnehna a chan aṭanga ni linaah chiah a fapa Rosberg hi a piang - kum ruk mi chauh a nih lai
aṭangin intlansiak khawvela a luhchilh nghal pawh hi a mak lo.

Rosberg-a pa Keke hi Finnish driver a ni a, a nu hi German Sina a ni thung. Finland leh Germany khua leh tui nihna a nei a, ṭawng hrang chi nga lai a thiam. 11 July, 2014 khan a naupan lai aṭanga a lo kawp tawh Vivian Sibold nen an innei a, fanu pakhat Alaia Rosberg an nei tawh.

Kum 2006 khan Formula 1 intlansiak a luhchilh ṭan a, hetihlai hian Williams car a khalh. Khawvela mortor intlansiakna hautak leh lian bera an ngaihah hian 2006 Bahrain Grand Prix kha a inlanna hmasa ber niin hnehna chang tur erawh chuan a nghah rei a ngai hle - 2012 Chinese Grand Prix-ah hnehna a chang ve chiah.

Williams chhuahsanin kum 2010 khan Mercedes a zawm a, hetah hian a hun tawp thlengin a awm. Rosberg hian Formula 1 car a khalh hun chhungin podium-ah vawi 57 a lawm a, ṭum 23 hnehna changin a point hmuh zawng zawng chu 1594.5 a ni.

Rosberg hian tun season bul a
ṭan ṭha hle a, intlansiak hmasa pali Australian, Bahrain, Chinese leh Russian Grand Prix-ah te hnehna chang zawn vekin a dinhmun a siam ṭha nghal hle a, season laihawlah tla hniam ve deuh mah se intlansiak vawi 21 a hmachhawn aṭangin tlan zawh theih loh a nei lo. Kum tluanin vawi kua hnehna changin ṭum 16 podium-ah a lawn a, a tum ram a thleng.

Mangṭha F1...

Khawvela a nih chak ber a nih hnuah Rosberg chuan, "Kum 25 chhung intlansiak khawvelah ka awm. Formula 1 world champion ni tur hian thawhrimna, natna, inpumpekna leh harsatna chi hrang hrang ka paltlang. Tunah chuan ka tum ram ka thleng ta a, tunah hian ka nuna ka hun tawn sang lai ber tawngin hmun nuam takah ka awm. He hun ka tawn theih nana min puitute zawng zawng chungah thinlung takin lawmthu ka sawi," tiin champion nomawi a chawi hlimin a sawi.

Famkim lohna khawvelah Ros-berg hian a dam chhungin seltu a nei tawh dawn a, chawimawitu pawh an bang chuang dawn bik chuang lo. A ṭhat vanglai taka Formula 1 inelna a chawlhsan sawi-seltu an awm hi a mak lo a, chutihrual erawh chuan kum 25 chhung a chenchilh Formula 1 khawvela a thil tih tawhte avang hian 'Driver cool leh dawhthei' tia hriat a ni reng tawh ang - Formula 1 World champion a nihna hi engti zawng maha sawi nep theih a ni lo.