Arsenal hmachhawn tur Bayern Munich

Arsene Wenger-a'n Cham-pions League Group A hmahruaitu an nih chian hnu lawkah group ṭhenkhatah chuan team ṭha berin hma an hruai kher loh thu a sawi. Arsenal manager hian a thu sawi dik zia a hmu dawn - last 16 a an hmachhawn tur chu German champion Bayern Munich a ni.

Nimin tlai khan Champions League last 16 khel tur draw chu Nyon-ah neih a ni a, champion lai Real Madrid chuan Napoli an hmachhawn dawn - Zinedine Zidane a naute tan champion nomawi humhim turin Champions League last 16 chinah chuan hei aia kawng awlsam thlan tur a tam lo.

Vannei Foxes?

Premier League champion Leicester City chuan Sevilla an hmachhawn dawn - Foxes tan an club history ziak danglam turin hun ṭha a in her zel. Club pahnih inhmachhawn tur hi an lawm ve vein a rinawm!

Manchester City-in Cham-pions League nomawi an duh a, season hmasaa semifinal luhpuitu Manuel Pellegrini chu contract thar ziahpui loin Pep Guardiola an lalut - an tum tur chu an la hmachhawn ngai loh Monaco niin French club lakah chungnung zawk tura beisei nghal an ni.

Vanduai PSG!

Paris Saint Ger-main-in Champions League quarterfinal mai duhtawk loin Europa League-a vawi thum a zawna champion thei Unai Emery an lalut a, last 16-a an hmachhawn tur chu Barcelona an ni. Catalan club hian 2012/13 leh 2014/15 quarterfinal-ah PSG hi an lo hnawt chhuak tawh. La Liga-a Barcelona ṭhatzia hrechiang tawhtu Emery hna a hautak dawn.

Arsenal-in 2013 leh 2014 khan Champions League last 16-ah Bayern Munich an lo hmachhawn tawh a, an tlawm ve ve! Season hmasa khan group stage-ah vawi hnih intawngin Emirates Stadium-ah 2-0 in chak mah se Germany-ah 5-1 ngawtin an tlawm - Bayern tum hi an
ṭawngṭaina a ni lo tawp ang.

Hei le Juventus

Juventus-in season nga chhung a zawnin Serie A nomawi an chawi tawh a, an duh ber chu Champions League a ni. Kum 2015 final-ah Barcelona an ngam lo a, season hmasa last 16-ah Bayern tawngin an vanduai bawk. Kumina an hmachhawn tur erawh Porto an ni a, Portuguese club hi last 16-a an tum châk pawl tak an nih a rinawm.

Season hmasa finalist Atletico Madrid-in Bayer Leverkusen an hmachhawn dawn a, an huphurh hran lo khawp ang.