Zarkawt hmaah Luangmual an zawr

Mahuma Memorial Cricket Tournament khelh mekah nimin khan Zarkawt Lords chuan chuan run 126-in Luangmual an sawp. Zarkawt hian over 40-ah run 237 siamin wicket sarih an hloh a, ball 110 a hmachhawna run 105 vaw chhuaktu opener Zahir Uddin a che ṭha fal hle.

Luangmual tan ball 42-a hmachhawna run 45 siamtu Raj Kumar Thakur rawn che ṭha viau mah se a ṭhiante aṭangin thlawptu a nei ṭha tawk lo a, over 29-ah run 111 siama wicket hloh vekin a tlawm zawkah an ṭang ta a ni. Vawiin chawhma dar 9:15 hian Ramhlun Venglai leh Kulikawn an inhmachhawn ve leh ang.

Suaka Memorial Cricket Ground, Sihhmuia inelnaah hian round sarih thleng inelna neih tur niin team pariat an inel mek a, nimin inkhel hi Round 7 match hmasa ber a ni. Table chung lam team pali, semifinal lut chin hi Mizoram cricket a inelna sang ber Mapuia Cricket League-ah an qualify ang a, table mawngphah team pahnih chu division hniam lamah an relegate thung dawn a ni.