Joe Hart leh Torino ngam loh Higuain
Gonzalo Higuain lakah Eng-land keeper Joe Hart leh Torino an zawr. Pathianni zan inkhelah Juventus chuan khualmualah 3-1 in hnehna an chang a, khawvela player manto pathumna Higuain-a'n goal hnih a khung.
Derby della Mole-ah Serie A champion lai Juventus-in si an phur hmasa. Daniele Baselli-a'n mual dinglam sir aṭanga cross chu Andrea Belotti chuan an hmahruaina goal ni turin minute 16-naah a tauh lut.
Juve-in nawr viau mah se goal dang an nei zui thei mai bik lo. Hun tawp nan minute riat chiah a awm tawh tihah Argentina international striker bawk a inlar leh. Higuain hian Mario Mandzukic siamsak hmangin an hmahruaina goal a kung a, a goal thumna tur erawh Hart-a'n a dan sak - hun tawp dawna Miralem Pjanic pet erawh Manchester City keeper tan dan ngaihna a awm tawh lo.
Massimiliano Allegri naute hian match 15 khelh tawh
aṭanga point 39 hmuin league hmahruaitu an ni zel a, an hnuaiah hian point 32 hmu AS Roma leh AC Milan an awm mek - Turin club hian match khatin khel hnem zawk rih mah se a zawna a vawi ruk nana league nomawi chawi thei turin an dinhmun an sawh nghet chho zel.
Juve manager Allegri chuan, "Kan inkhelh kalphungah fuh tawk lo leh duhthusam lo lai deuh awm mah se a pumpui thlir chuan kan theihna sanzia kan lantir a, hnehna chan kha kan phu. Higuain hi chu goal khung tur bika piang a ni a, a pet goal loh hi chuan amah a intham lo zawk hial ṭhin," tiin a sawi.
Higuain hian Torino hi an ngam hle a, league match-ah bik a hmachhawn hnuhnung vawi sarihah goal ruk a khung tawh. Hei bakah Juve hian an intawn hnuhnung pathumah goal 11 khungin hnehna an chang vek.
Napoli tan Mertens
Season hmasa Serie A pa-hnihna Napoli tan Dries Mertens chuan Cagliari lakah hattrick siamin 5-0 in hnehna a chanpui a, goal hnih dang hi Marek Hamsik leh Piotr Zielinski te khung a ni thung.
Pathianni zan inkhel dangah Inter Milan tan Marcelo Brozovic chuan goal hnih khungin Genoa lakah 2-0 in hnehna a chanpui. March thla hnua a vawi khat nan Inter hian an khelmualah a zawnin league match li chhung hnehna an chang ve leh ta.
League table mawngphaha awm Palermo chu a zawna a vawi kua chak loh nan Chievo lakah 2-0 in an tlawm. Parukna Atalanta chu a zawna an vawi hnih chak lohna ni turin Udinese 3-1 in an hneh lo bawk - Bologna leh Empoli te goal awm loin an inhnehtawk thung.