Chelsea chakna Costa

Pathianni zan khan Chelsea-in Diego Costa goal hmanin West Bromwich Albion 1-0 in an hneh. Antonio Conte hote Premier League table chung berah an let leh tak avangin Arsenal-in hmahruaina fawng an chelh hun chhung chu darkar 24 pawh a tling lo.

Danglamna Costa

Stamford Bridge-ah West Brom-in tlarhnung an rem phui ṭha a, Chelsea-in point hnih an hloh ngei dawn niin lang hman. Amaherawhchu minute 76-naah Baggies defender Gareth McAuley-a'n Spain striker lakah ball a hloh a, Chelsea forward Costa hian box chhungah ball lalut nghalin keeper Ben Foster-a dan rual loin a ke vei lamin a khung.

Kum 28-a upa Costa hian tun season league-ah goal 12-na a khung chiah a, season liam taa a goal khung zat nen a inzat chiah. Chelsea hian goal zawnah vawi hnih chiah an pet a, Costa goal bakah yard 30
aṭanga David Luiz freekick chiah goal zawnah a kal a, Spain striker hi Blues danglamna a ni.

Vawi 9 chak zawn

Chelsea-in September 24 khan Arsenal 3-0 in an hneh lo a; hemi hnu hian Conte hote hian club pakua Hull City, Leicester City, Manchester United, Southampton, Everton, Middlesbrough, Tottenham Hotspurs, Manchester City leh West Brom te an hneh vek.

Blues boss Antonio Conte chuan, "West Brom inpuah-chahna a ṭha a, tlarhnung an rem phui ṭha a, hmun awl min siam lo. Goal kan khung lawk loh avangin harsa mah se a hunah tak goal kan khung a ni. League harsa takah a zawnin vawi kua kan chak a, hei result lawmawm tak a ni," tiin point thum an hmuh avang a lawm thu a sawi.

Chelsea hian Nilaini zan dar 1:15-ah Sunderland an tlawh ang a, West Brom-in hemi zan dar 1:30 hian Swansea City an mikhual ang.