Reds an tho thei lo

Bournemouth laka 4-3 a an tlawm hnuah Liver-pool boss Jurgen Klopp-a'n an thawh leh tur thu sawi mah se West Ham an mikhualna inkhelah a beisei ang result a hmu lo - Reds hian an tlarhnung phui tawk lo bawk tuarin Hammers chu 2-2 in an inhnehtawkpui.

Cherries laka goal li chhuahtu Liverpool tan an goal hnih chhuah hi venhim theih ni mah se an chhuah miau a, nomawi chawi tura Chelsea leh Arsenal nen an inumna kawngah a hnungtawlh zawngin an kal mek.

Tlarhnung pherh

Anfield-a inkhelah hian Adam Lallana chuan minute 5-na lekah goal hmahruai khung mah se chhanglet turin Ham-mers-in hun an duh rei lo. Minute 27-naah London club hian freekick an hlawh chhuak a, Dimitri Payet freekick pet naran nia lang chu Bournemouth laka che-sual Reds goalkeeper Loris Karius-a'n a dang thei lo.

West Ham goal hnihna luh dana dem tur pawh Liverpool tlarhnung bawk an ni. Field chanve aṭanga Havard Nordtveit ball cross turin Jordan Hen-der-son lu a per hnu-ah Reds centre-back Joel Matip-a chesual a, Michail Antonio-a'n a tlanpel hnuah a khung - goal dang turin Loris Karius-a'n a tih tur a ti lo bawk.

Reds ringawtin an tisual reng bik lo. West Ham goalkeeper Darren Randolph chuan Sadio Mane ball cross chu lo khawih perin Divock Origi ke bulah tak a tla a, Belgian striker hian inelna hrang hrangah match li chhung a zawna a goal khungna ni turin a a pet goal - February 2014-a Daniel Sturridge hnua Reds player zinga he dinhmun luah leh thei hmasa ber a ni.

Theihtawp chhuahtu

Liverpool boss Jurgen Klopp chuan, "Kan theih-na zawng zawng kan pe a ni. West Ham goal hma-hruai kha freekick aṭanga lut a ni a, an goal hnihna lah vanneih goal a ni. Ham-mers-in 2-1 a hma an hruai lai pawh khan an tlarhnung kan rum ṭhaih reng a, chak ngei tumin kawng hrang hrangin kan bei a ni. Kan hun tam zawk box chhungah kan hmang a, tun ṭum chu kan lamah van-neihna a ṭang lo a ni," a ti.

German coach chuan an goal chhuah dan chungchang sawilang nghalin, "Kan goal chhuahte kha venhim theih an ni. Goal hmasa zawk chhuah lo tur kha chuan foul loh a, ball hloh loh a tawk. Goal hnihna kha chu vanduai vang a ni. Season ṭha tak hmangtu Joel Matip a chesual a, Loris Karius tan inven hman a ni tawh lo," tiin an chetsual pawm mah se a player te a chhan.