England-in match 1000 hriatrengna ha dawn

November 14 zana Montenegro nena Euro 2020 qualifier khel tur England chuan international match 1000-na an khel dawn a, a hriatrengna jersey an ha dawn. 

Kum 147 liam taa England tana lo inlan tawh player zawng zawng chu he match 1000-na pual hian jersey pek vek an ni dawn a, Three Lions coach Gareth Southgate pawh pek a ni ang. Southgate hian player a nih laiin England tan match 57 a khel hman a, December 1995-a Three Lions tana a match hmasa ber a khelh khan England tana inlan thei player 1,071-na a ni a, hemi number chuanna jersey hi pek a ni dawn. 

England tana lo inlan tawh player-te chu hetiang zela number chuanna jersey pek an ni dawn a, England international match hmasa bera number 1 hatu goalkeeper Robert Baker aṭangin number hi ṭan a ni dawn. Number hi jersey hmaa ram logo chuanna hnuaiah nem kai a ni dawn a, Wembley Stadium-a inkhel tur hi Three Lions captain hlui leh 1966 World Cup champion team-a player-te chuan a hmunah an en dawn a ni.