Man Utd leh Mourinho tan Mkhitaryan

Manchester United-in Hen-rikh Mkhitaryan-a goal hmangin an elpui Tottenham Hotspurs 1-0 in an hneh. Jose Mourinho hote table-ah paruknaah awm chhunzawm mah se Old Trafford-a league match li chhung an khingpuite an draw hnua point thum an hlawhchhuahna a nih avangin result hlu bik a ni.

Lawmna famkim lo

United an hmuhnawm nghal a, khawvel player manto ber Paul Pogba, veteran midfielder Michael Carrick leh Spanish midfielder Ander Herrera te hmangin inkhel an thunun.

Minute 29-naah Spurs forward Harry Kane-a ball hloh chu United midfielder Herrera-a'n chang fuhin Mkhitaryan-a tan ball ṭha bik a pe lut a, Armenian midfielder hian a tlan chakna hmang ṭangkaiin kawh zetin a pet goal.

Borussia Dortmund aṭanga United zawmtu Mkhitaryan hi Armenian zinga Premier League-a goal khung hmasa ber a nih bakah khelmual chhungah player langsar a ni. Amaherawhchu Europa League-a Zorya lama goal ropui khung tawhtu Mkhitaryan hi minute 85-naah Spurs left back Danny Rose-a'n a tih tlukna lamah a inhliam a, December 26 (Boxing Day)-a Sunderland an hmachhawn hunah chauh a rawn let leh beisei a ni.

Armenian midfielder hi Nilaini zana Crystal Palace an hmachhawn hunah leh Inrinnia West Bromwich Albion an tlawh hunah a inlan ve thei dawn lo.

Hlauhthawnna

United midfielder Pogba-a freekick petin goal ban a per a, Spurs midfielder Victor Wanyama-a'n hnai tak aṭangin a tauh goal lo. Mourinho hoten goal hnihna an khung theih loh avangin hun tawp thlengin ngaih ngam takin an khel thei lo.

Kar liam ta khan Marouane Fellaini-a'n hun tawp dawna penalty a chawi avangin Everton nen an inhnehtawk a, Spurs nena an inkhelh ṭum pawh hian hun tawp dawna Belgian midfielder-in warm up chu United ṭantu ṭhenkhatin an 'boo' hial. Injury time-ah minute ruk pek a nih bawk avangin United player-te hlauh-thawnnain an khat a, hun tawp lamah tihsual ho te te nei mah se goal an chhuah bik lo.

Mourinho-a'n a ze ngei a chhuah a, United supporter ṭhen-khatin duh lo mah se Fellaini chu khelmual chhungah a luhtir tho a, Belgian midfielder hian pawi khawih tur emaw tih ṭhat nei tur pawhin hun a nei tawh chuang lo.

Fellaini tan

Manchester United manager Jose Mourinho chuan, "Tuna kan chakna hi Fellaini tan ka hlan duh a ni. Everton nen khan point hnih kan hlohna chhana mawhphurtu a ni a, chutichung chuan ka tan player pawimawh a ni tih hi ka tichiang duh a ni," tiin a sawi a, Portuguese manager hian Belgian midfielder au eltute erawh a dem duh lo thung.

Inkhel chungchang sawiin Mourinho chuan, "Ṭha takin kan khel a, result ṭha erawh kan nei ṭhin lo. Spurs lakah hian kan khel ṭha emaw ṭha lo emaw point thum hi kan mamawh a ni. Kan khingpui te hi an goal venhim dan leh an goal nawr dan thlirin team ṭha ber zinga mi a ni a, hetiang team kan hneh theih avangin ka player ten fak an phu a ni," a ti.

Tottenham manager Mauri-cio Pochettino chuan, "Kan intluk tawk viauin ka hria. Keini aiin goal chance insiam an thiam zawk hret a, kan tih goal loh laiin anni chuan an ti goal a ni," tiin an inthlauhna a tam loh thu a sawi ve bawk.

Pathianni zan Premier League inkhel dangah Sou-thamp-ton-in Sofiane Boufal-a goal hmangin Middlesbrough an hneh ve bawk.