MPL Playoff khel tur New Serchhip

New Serchhip FC-in Aizawl DFA club Venghlui FC 2-1 in an hneh a, Mizoram Premier League Playoff-ah Ramhlun North FC an hmachhawn ang.

Nimin Lammual inkhel hmuh-nawm takah New Serchhip-in Lal-hruaizela leh Remlalruata te goal hmangin 2-0 in hma an hruai a, Venghlui tan injury time-ah Remlalruata'n goal khat a khung ve hram.

MPL6 Qualifier-ah Mizoram Police-in Venghlui FC (6-1) leh New Serchhip (5-2) hnehin Mizoram football inelna sang ber khel turin an inpet tling. Police laka goal chhuah tlem zawk New Serchhip tan MPL Playoff khel turin point khat chauh tawk mah se L&L Football champion hian Aizawl DFA club Venghlui lakah an ṭhat zia lantirin hnehna an chang.

New Serchhip hian December 14 leh 16-ah Ramhlun North nen MPL Playoff an khel dawn a, MPL5 pasarihna Lalruatliana Sailo hote hmabak a awlsam kher lo ang. New Serchhip FC hian Serchhip chhunga football inelna District C'ship, I Day Football leh L&L Football-ah nomawi an chawi vek a, Tlungvel-a Princess Mimi Cup-ah an champion bawk.