BVT ka huphurh lo - Sanga

Chanmari FC coach Lalsangzuala Hmar chuan, "Huphurh ka nei ngai lo, coach tan hu-phurh neih a thiang lo a lawm," tiin Aizawl FC an hneh zawhah Bethlehem Vengthlang a huphurh loh thu a sawi.

Sanga hote hian MPL final hnuhnung pahniha an hneh loh Aizawl FC chu MPL5 final lut turin ṭum hnih an hneh a, first leg leh second leg belhkhawm a an chakna zat chu 6-2 a ni. December 16, Zirtawpni zanah Chanmari FC-in an veng ṭhenawm Chanmari West hnehtu Bethlehem Vengthlang FC nen nomawi an inchuh ang.

Chanmari FC-in season li chhung final an lut tawh a, Bethlehem Vengthlang erawhin season liam ta khan tun ṭuma Chanmari coach Lalsangzuala Hmar kaihhruaina hnuaiah semifinal an thleng a, MPL5 hi an vawi khat final thlenna a ni.

A club hlui chung-chang sawiin Sanga chuan, "Tum châk tih zawngah chuan BVT hi hmachhawn châk lo mah ila ka tum dawn tho. Nikum khan BVT hi final ka thlen pui zo lo a. Coach ṭha an nei a, kei aia ṭha leh experience nei ṭha zawk an nei a, ka lawmpui khawp mai," tiin I League club awlsam takin hneh thei mah se an hmabak a la awlsam loh thu a sawi.

MPL5 final inkhel en man hi Rs 100 a ni ang. Chanmari FC ṭantute hi K. Kawla Stand leh S. Malsawmtluanga Stand-ah an ṭhu ang a, Bethlehem Vengthlang FC ṭantute Zomuanthanga Stand leh Zohminga Zote Stand-ah an ṭhu thung ang.