Mumbai vs Kolkata Sena vs Didika

Indian Super League khelh meka final lut tur team pakhat chu zaninah a chiang dawn - dar 7:00 hian Mumbai City chuan khualmuala 3-2 a an hneh loh Atletico de Kolkata an mikhual dawn a, hnehna chan ngei an tum dawn.

Kolkata-in first leg-a hnehna an chan ṭumin Mizo tlangval Lalrindika Ralte chuan Kolkata tan goal hmahruai a khung a, Lunglei tlangval hian second leg-ah pawh a club hlui a hmachhawn theih ngei a beisei thu Vanglaini palai a hrilh - zaninah en bik a sual lo ang. ATK-ah Khawzawl tlangval Robert Lalthlamuana a awm bawk.

Mumbai City-ah first leg-a penalty chawitu Lal-hmangaihsanga Ralte a awm a, North Mualcheng tlangval hi Kolkata khawpuiah chesual mah se a inlan leh tho beisei a ni a, David Lalrinmuana leh hliam damkawr Lal-chhuanmawia Fanai ten inkhel bul an ṭan a beiseiawm loh.

Costa Rica boss hlui Alexandre Guimaraes en-kawl Mumbai tana pawi ber tur chu Diego Forlan an chhawr thei lo tur hi a ni. Atletico Madrid striker hlui hian semifinal hmasa zawkah red card a hmu a, zan-inah a inlan thei dawn lo.

Indian Super League semifinal-ah hian vawi hnih inkhel belhkhawma chak zawk zawkin final an lut ṭhin. Team pahnih an inhnehtawk a nih erawh chuan away goal rule hmang tawh loin extra time an khel ang a, chak zawk an la awm loh cheu chuan penalty hmanga chak zawk zawn tur a ni.