Jerry Mawia a 'mawi' leh ta
Mizo tlangval Jerry Mawihmingthanga chuan Odisha FC tan goal hnih khungin assist vawi hnih a nei a, Mumbai City FC lakah a team chu 4-2 a hnehna chanpuiin Hero of the Match-ah thlan a ni.
Ningani zan Indian Super League inkhelah hian first half chhungin Odisha hian 3-0 in hma an hruai hman a, Xisco Hernandez, Aridane Santana leh Jerry ten goal khat ṭheuh an khung. Xisco-a'n Odisha tana goal hmahruai a khung hnuah Santana chuan an goal hnihna a khung a, Jerry-a siamsak a ni. Chanmari tlangval hian minute 40-naah goal a khung zui.
Second half-ah Mumbai City hian Mohamed Larbi penalty hmangin beiseina nei thar ve mah se Jerry bawk a inlar leh a, Mizo tlangval hian duhthusama ṭhain Santana tan bawk a siamsak. Spanish third division club Cultural y Deportiva Leonesa aṭanga loan-a Odisha pantu Santana hian harsatna nei loin goal-ah a chantir a, Mumbai tana hun tawp ruala Bipin Singh goal khungin awmzia a nei lo.
Odisha tan hian Daniel Lalhlimpuia chu bench aṭanga luhtir a ni a, Lalchhuanmawia Fanai erawh hliam vangin squad-ah a la awm thei lo - nghah deuh a la ngai.
Zanin Inkhel Tur
Hyderabad FC 7:30 PM Kerala Blasters
November 3, Pathianni Zan
Jamshedpur FC 7:30 PM Bengaluru FC