WWE-ah Fury a chak nghal

British boxer rothap Tyson Fury chuan WWE match a hmachhawn hmasak berah hnehna a chang nghal a, Ningani zan khan Braun Strowman chu WWE Crown Jewel-ah a 'knockout'. 

Miin hmuhnawm an tih dan tura story kalhmanga duan ni mah se Fury a inlan miau avangin Saudi Arabia-a WWE neih hi khawvelin a ngaihven a, rin lawk ang ngeiin hnehna a chang zui. Fury hian fight a hmachhawn hma hian, "WWE hi miin thil lem mai maiah an ngai a nih chuan ti ve chhin rawh se. Hetiang em ema training hautak hi ka la hmachhawn ngai lo," tiin a lo sawi tawh. 

WWE ring a rah avanga pound maktaduai 10 chuang hlawh nia sawi Fury chuan WWE-a a kir dawn leh dawn loh a sawi chiang duh lo. Fury chuan, "Ka hmaah hian fighter inchhawp Deontay Wilder a awm a, chumi hnuah chuan kan kal zel dan tur kan ngaihtuah ang," a ti a, British boxer hian February 22-a  WBC world heavyweight champion Wilder nena an inhnek tur chu thlir hmasakah a nei. 

Ningani zana WWE match ngaihven hlawh dangah Brock Lesnar chuan vawi hnih ngawt UFC heavyweight champion lo ni tawh Cain Velasquez a hneh bawk a, American fighter hi UFC-ah October 2010 khan a lo ngam 

lo tawh. Saudi Arabia-a hmeichhe fight hmasa berah Natalya chuan Lacey Evans a hneh a, an taksa an thuam phui ṭha hle!