India-ah World Cup kan en thei dawn

World Cup kan en thei dawn lo emaw tih hnuah, India chuan World Cup pe chhuaktu tur, broadcaster a hmu ve ta a, football khawvela thuneitu sang ber FIFA chuan Zee Entertainment Enterprises Ltd (ZEEL) a thawhpui dawn.

ZeeL hian infiamna khawvel luhchilh thar lehin, sports channel Unite8 Sports 1, Unite8 Sports 1 HD ( Hindi), Unite8 Sports 2 leh Unite8 Sports 2 HD (English) te a nei thar a, heng channel-ah hian television aṭang chuan inkhel a en theih ang.

Online-a en duh tan pawh Zee5 app leh website-ah en theih tura tih a ni a, Zee5 hi thla thum atan Rs. 799 leh kum khat atan Rs. 1699-a subcribe theih a ni a, World Cup hi June 11-ah khel ṭanin, July 19 zanah final khelh a ni dawn thung - World Cup en nan Rs. 799 sen a ngai dawn tihna a ni.

Tun ṭum World Cup hi zan lai leh zing kara inkhel a tam avangin, FIFA chuan India rama broadcaster tur a hmu lo reng a, a chhang duh tana dollar maktaduai 100 a tih pawh $60mtd-ah a tihniam hman hial.

India rama broadcasting company lian bera chhal ngam JioStar chuan $20mtd sen an inhuam a, mahse, FIFA chuan hei hi a pawm bik lo. A tawpah chuan ZEEL an lo lang a, FIFA nen inremin, India-a World Cup pe chhuaktu an ni dawn ta a ni.

ZEEL leh FIFA hi tun World Cup atan chauha inrem loin, World Cup 2034 thleng atan an inrem a, World Cup vawi thum chu ZEEL hian an chang dawn tihna a ni - a kar laka FIFA tournament hrang hrang, Women's World Cup, Futsal World Cup leh age level World Cup thlengin ZEEL hian an pe chhuak ang.

FIFA leh ZEEL inremna zat hi eng zat chiah nge tarlan ni lo mah se, an inrem rei dan ngaihtuahin a tlem lo ang tih a rinawm.