French Open: Sinner tel lo pawhin Italian 3 la dam

World no. 1 Jannik Sinner tla tawh mah se French Open-ah Italian player pathumin quarterfinal an lut a, vawiinah Italian pathum Flavio Cobolli, Matteo Berrettini leh Matteo Arnaldi te hi an inlan vek dawn.

Italian pathum zinga seeded sang ber Flavio Cobolli hi tun ṭum inelnaah hian seeded no. 10 a ni a, amaherawhchu a khingpui tur Felix Auger-Aliassime hi seeded no. 4 a nih avangin semifinal thlen a harsa dawn.

Chutihrualin kum 2024 khan Cobolli leh Auger-Aliassime te hi ṭum hnih an inhmachhawn a, Canada Masters leh Acapulco-ah Cobolli hian hnehna a chang ve ve. Canadian no. 1 Auger-Aliassime tan a serve ṭhatna hi a chungnungna tura ngaih a ni a, Cobolli tan fimkhur a ṭul ang.

Matteo Berrettini leh Matteo Arnaldi te an inhmachhawn dawn avangin Italian pakhat talin semifinal an lut dawn tihna a ni. Kum 30 mi Berrettini hian Australian Open leh US Open-ah semifinal a lut tawh a, Wimbledon-ah final a lut tawh bawk avangin tawnhriat a nei ṭha zawk. Kum 25 mi Arnaldi tan tun ṭum inelna hi Grand Slam-a a chet ṭhat ber ṭum a ni.