Fenerbahce-in Greenwood an duh

Turkish Super Lig club Fenerbahce chuan Mason Greenwood lakluh an tum dawn - club President thar nih tuma inchuh mek president Aziz Yildirim leh Hakan Safi te chuan Greenwood lakluh an tum thu hi an sawi ve ve tawh a ni.

Greenwood hi French club Marseille tan khel mekin, kar hmasa lawk khan club sporting director thar Gregory Lorenzi chuan English forward duhtu an awm chuan hralh tura an inhawn thu a sawi.

Manchester United-a pawngsual thubuai a neih avanga English club tana inlan zui ta lo Greenwood hian July 2024 khan Marseille hi a nghetin a zawm a, kum 24 mi striker hi a khel chhe lo - a season hmasa berah match 36 khela goal 22 khungin, season hman zawh takah khan match 45-ah goal 26 a khung bawk.

Mahse, Greenwood hian a nungchang avangin buaina a nei fo a, French club hian hralh an pawiti lo. Hetihrual hian kum thum lai contract a la neih avangin a man erawh a tlawm a rinawm lo a, Fenerbahce bakah hian AS Roma pawhin an ngaihven nia sawi a ni.

Marseille hian Greenwood hi an hralh a nih chuan Manchester United chuan sum engemaw zat an hlep ve thei dawn. Kum 2024-a an hralh khan pound maktaduai 26.6-in an hralh a, mahse, Marseille hian an hralh leh a nih chuan, sum engemaw zat dawn ve theihna tur an ziak tel a ni.