James tel loin Colombia an chak

World Cup inpuahchah nan Colombia chuan Thawhṭanni zan khan Costa Rica nen Friendly match an khel a, an player pawimawh James Rodriguez tel lo mah se harsatna tawk lo a, 3-1 a hnehna an changin World Cup atan an inpeih tawh tih an lantir.

Colombia tan Tottenham Hotspur defender hlui Davinson Sanchez, Bayern Munich forward Luis Diaz leh Sporting Lisbon forward Luis Suarez ten goal khat ṭheuh an khung. Costa Rica tan Andrey Soto-a goal chu scoreline cheimawitu chauh a ni.

Real Madrid midfielder hlui Rodriguez chu damlohna avangin buai a, tun season Major League soccer-ah pawh minute 194 chauh a la inlan. Heti chung hian squad-ah telh a ni tho a, 2014 World Cup-a a chet ang khan ropui nawn a tum leh ang.

Hetihlai hian Colombia squad an ṭha tawk tih a lang a, position tinah Europe club langsara khel thei kawl vekin, James awm lo pawh ni se an buai phah lo ang. Champion tura rinkai zingah tel pha lo mah se, Colombia zuam chi an ni dawn lo a, thilmak thlentir turin theihna sang tak an nei a ni.