Palina chin nih tum inlan hun Man United, Arsenal, Chelsea leh Spurs

Premier League match 10 chauh an la khel a, champion lai Manchester City leh nikum lama an elpui Liverpool te bawk an tal na - anni pahnih hi champion tura rinkai an ni. Nomawi chawi a har tluk zetin club dang tan a sang pali zinga tel pawh a awlsam dawn lo.

EPL aṭanga Champions League khel phak ni turin bawm a tawt hle. Chelsea, Arsenal, Manchester United, Tottenham Hotspur bakah Leicester City te chu hmun inchuh tura ngaih an ni a, hmunruak pahnih bak a awm dawn loa a lan avangin inelna a sang dawn.

Arsenal leh Crystal Palace te 2-2 a an inhnehtawk ṭumin Gunners captain Granit Xhaka thlak a ni a, Switzerland international hian fans lam ti el letin a chhuak tau. Manager Unai Emery-a'n nimin tlai thleng khan a captain dinhmun tur a la sawi chiang thei lo.

Swiss midfielder chuan a dinhmun sawifiahin, "Arsenal hi ka hmangaih a, khelmual chhung leh a pawnah 100% theihna ka hlan. Ka dinhmun hi fans lamin min hriatthiampui lo a ni, tun hnaiah social media kaltlangin vaukhanna thu ka dawng hnem hle.

"Mi ṭhenkhat chuan ṭawngkam chhe tak takin min bei a, ka chhungte tih nat thlengin min vau. Kil tin ka ngaihtuah a, khelmual ka chhuahsan dawn khan ka rilru na chuan a vawr tawp thlengin khatiang khan ka chet phah," tiin a sawi.

League Cup-ah chuan Xhaka hi chhawr a ni lo a, zanin dar 8:30-a Wolverhampton nen an inkhelh hunah Emery-a'n a chhawr zui dawn em tih pawh hriat a la ni lo. Xhaka hi Arsenal jersey ha in a inlan leh a nih chuan fans lamin a insawifiahna an pawmsak leh pawm loh chu an thawm aṭangin a hriat theih ang.

Beisei anga season bul ṭan fuh lo Manchester United-in tun hnaiah beiseina an nei thar ve leh. Ole Gunnar Solskjaer-a naute hi Liverpool nen an inhnehtawk hnuah Partizan, Norwich City leh Chelsea te khualmualah an hneh vek.

Man united striker Marcus Rashford chuan, "Season tir lamah a zawna vawi hnih hnehna kan chang a nih chuan kum kan hman chhoh dan a ti danglam thei. Tunah hian a zawnin vawi thum hnehna kan chang ve ta a, keini ang team lian tan chuan a pawimawhin kawng dik zawh theihna a ni.

"Rilru puthmang a dik a, tun anga kan kal zel a nih chuan table lamah pawh hma kan sawn chho zel ang. Hmasawn tur erawh chuan game mal te te in hnehna kan chan chhoh zel a ngai," tiin a sawi.

Man United hian zanin dar 6:00-ah AFC Bournemouth an lenchilh dawn a, an khingpui nen hian point 13 ve ve nei lai an ni - hnehna an chang a nih chuan an tho chhuak dawn niin a ngaih theih ang, an chak lo leh a nih erawh chuan a sang pali zinga tel pawh a harsa tawh ang.

Premier League season tir lamah Chelsea hi United lakah an tlawm a, league lama an ngam loh bawk hi League Cup aṭanga pet tlatu an ni. Frank Lampard-a naute hian zanin dar 11:00-ah Watford an lenchilh dawn - insiamṭhat nghal an tum ang.

Man United an ngam loh hnu hian a zawnin match li chhung chu league-ah hnehna an chang, an boruak tawn hmasak ang bawk hi tawn nawn leh an duh ang. Lampard-a'n player naupang chungah rinna a nghat nawn leh ngei dawn a, chutihrualin hliam vangin an ṭhat dan berin an la inlan thei dawn lo.

Blues hian hliam vangin an midfielder pawimawh N’Golo Kante an la chhawr thei dawn lo. Lampard chuan, "Ni thum hnu velah training a zawm thei ang," tiin France international chungchang a sawi. Jorginho leh Mateo Kovacic te chu inkhel khaikhawmtu pawimawh an ni leh dawn.

London club hian Watford lakah result an nei ṭha ṭhin, league match bika an intawn hnuhnung vawi 11-ah chak loh vawi khat chiah an nei. Vicarage Road-ah hian 2018 February thla khan 4-1 in an tlawm tawh, chesual thut thei ve tho chu an ni.