Thawnthu thar kan ziak ang - Wenger

Champions League last 16 inkhel tur a chian hnuah Arsenal manager Arsene Wenger chuan thawnthu thar an ziah tawh tur thu a sawi chhuak!

Tun hnaiah Arsenal hian kum 2013 leh 2014 Champions League last 16-ah Bayern Munich hi an lo hmachhawn tawh a, an chak lo ve ve. Gunners hian German champion bawk hi an hmachhawn leh dawn.

Gunners hi group hmahruaitu an nih loh avangin Emirates Stadium-ah an khel hmasa ṭhin a, kuminah erawh Paris Saint-Germain chunga an awm avangin an khelmualah second leg an khel ve thung tawh ang.

French manager Wenger chuan, "Kan khelmualah kan khel hmasa ṭhin a, hma kan hruai hnuah goal an chhuah vangin dinhmun ṭha lo zawkah kan ding leh ṭhin - kuminah erawh a danglam tawh ang. Tun hma lama thil lo thleng tawhte thlak thlengin thawnthu thar kan ziak dawn a ni," tiin a sawi.

Arsenal hi tun hnai season ruk chhung chu Champions League group stage paltlang ziah mah se quarterfinal an lut phak ngai lo. Nakkum February 15 khian Allianz Arena-ah Bayern an lenchilh anga, March 7-ah German champion hi an mikhual leh bawk ang.