Ramhlun North-in MPL khel zel dawn em?

Mizoram Premier League Season 6 Playoff chu vawiin chawhnu 1:00 hian Lammualah khelh a ni dawn. MPL5 pasa-rihna Ramhlun North leh quali-fier-a pahnihna New Serchhip FC an inhmachawn ang.

MPL Playoff-ah hian away goal rule hman a ni a, vawiin hi Ramhlun North 'home' a ni ang. December 16-a second leg an khelh hunah New Serchhip-in mualneitu chan an chang thung ang.

Ramhlun North coach Lal-ruatliana Sailo chuan, "MPL khelh zel kan duh a, playoff kan khelhna chhan hi kan ṭhat loh vang ni loin tawnhriat kan la neih tam tawk loh vang a ni. Away goal rule dan vangin kan buai lo a, kan match hnih khelh turah hian chak ve ve kan tum ang," tiin Vanglaini palai a hrilh.

MPL5 Qualifier-a champion tawh Ramhlun North hian Nigerian forward Oneyeama Francis an la kawl a, an player an dam kim bawk avangin chak tura rinkai zawk an ni.

New Serchhip FC hi in-khel an player pawimawh R. Lalremruata (Arapa) bakah Venghlui lama goal khungtu Lalhruaizela te inhliam vangin an inlan thei dawn lo.

New Serchhip FC president Zarzosanga chuan, "Kan ṭhat theih dan berin Ramhlun North kan hmachhawn thei dawn lo a, hei vang hian defensive game kan khelh a ṭul dawn a ni. Match hnih khelh tur a nih avangin beiseina kan nei a, theihtawp kan chhuah ang. Tunah hian Ramhlun Vengtharah kan thleng a, kawng engkima min buaipuitu an veng YMA leh Local Council te chungah kan lawm takzet a ni," tiin a sawi.

MPL Playoff Thlirletna

Mizoram Premier League Playoff hi relegation/promotion playoff tihin a sawi theih bawk. Playoff-ah hian MPL-a pasa-rihna leh Qualifier-a pahnihna ten double legged playoff hmang-in an khel a, minute 180 chhunga chak zawk hian Mizoram chhunga football inelna sang ber khel turin an tling ang.

MPL2 Playoff

Luangmual FC chu MPL1-ah pasarihna an nih avangin MPL2 khel turin playoff khelh a ṭul. MPL2 Qualifier-ah Chan-mari West an champion a, pahnihna Khawzawl FC-in MPL khel turin playoff an khelh a ngai ve bawk.

Luangmual hian MPL2 Playoff first leg-ah Khawzawl hi 4-1 a hnehin second leg-ah 2-2 in an inhneh tawk. Aggregate-ah Luangmual 6-3 in an chak.

MPL3 Playoff

MPL2 pasarihna chu Chan-mari West FC an ni a, West Warrior hian MPL3 Playoff-ah qualifier-a pahnihna Bethlehem Vengthlang FC an hmachhawn. MPL3 Qualifier-a champion chu Lunglei FC an ni.

West Warrior hian first leg-ah 3-2 in Aizawl DFA first division champion BVT FC an hneh a, second leg-ah goal awm loin an inhnehtawk a; aggregate-ah Chanmari West 3-2 in an chak.

BVT hi an vannei zui tho a, MPL2 final thleng thei Luang-mual FC chu supporter-te chet mawi loh vanga hrem an nih avang-in MPL khel turin an tling ta tho.

MPL4 Playoff

MPL3-ah Reitlang FC chu pasarihna an ni a, MPL4 Quali-fier-ah Luangmual FC chu cham-pion niin Upper Republic FC chu pahnihna an ni.

Reitlang leh Upper Republic inkhelh ṭum hi playoff history-a goal luh tam ber ṭum a ni a, first leg-ah ringawt pawh goal 10 lutin team pahnih hi 5-5 in an inhnehtawk. Second leg-ah MPL-a tawnhriat nei tawh Reitlang 1-0 in an chak a, Upper Republic-in MPL khelh an beiseina a tawp zui bawk.

MPL5 Playoff

Luangmual FC chu MPL4-ah pasarihna a ni a, MPL5 Qua-lifier pahnihna Chhinga Veng nen playoff-ah an inhmachhawn. Aizawl DFA champion Chhinga Veng hi first leg-ah 1-0 in an chak a, second leg-ah Luangmual nen 1-1 a inhnehtawk lehin MPL khel turin an tling.