Ban elhah Mizo che ṭha

PAFI (People's Armwrestling Federation India) buatsaiha neih, National Arm Wrestling Championship vawi linaah Mizo hming a mawi - Mizoram aiawha feh chhuakten gold medal 15 an elh chhuak a, silver medal 14 leh bronze medal 10 an la tel bawk.

Mizoram tana fehchhuak zingah Vanramnghaki a langsar a, Melthum nula hian 65+kg-ah right leh left-ah gold medal a la ve ve a, champion of champions (para women) a ni thei bawk - pui tak a ni.

Mizo zinga arm wrestling larpui bera chhal ngam Denic Lalruatttluanga pawhin a tihdan pangngaiin gold medal a hlawh chhuak a, ITI tlangval hi 90kg (right) senior men-ah inlanin, gold a hlawh chhuak.

National Arm Wrestling Championship 2026 hi May 29 - June 2 inkar khan Gandhinagar, Gujarat-ah neih a ni a, Mizo arm wrestler 35 zet an feh chhuak a ni.