Knicks-in game 1 an la nghal

Conference Finals khelh zawh a nih hnuah nimin zing khan NBA Finals khelh a ni a, New York Knicks chuan 105-95 in San Antonio Spurs an hneh a, best of seven series-ah game 1 an la nghal. Team pahnihte hian Inrinni zing dar 6:00-ah game 2 an khel leh nghal dawn.

Frost Bank Center, San Antonio-a inkhelah Spurs-in bul an ṭan ṭha zawk a, an thiampuipa Victor Wembanyama a che ṭha nghal. Wemby hian Josh Hart a block hnu lawkah three points a lut nghal a, hei hian inkhel boruak a tihnun phah. Wemby bakah Julian Champagnie leh Dylan Harper te kut a kal nghal avangin, Spurs-in 27-19 in first quarter-ah hma an hruai.

First quarter khelh zawh a nih hnu lawkah Knicks team khaipa Jalen Brunson-a'n hliam tenau a nei a, bench-ah pawh ṭhu loin dressing room-ah a lut tlang. Spurs game a ṭhat bakah Brunson a inhliam avangin an chak lo dawnin a lang hman a, Knicks ṭantute an hlauthawng.

Mahse beisei ang ngawtin thil a kal lo a, second quarter-ah Knicks an insiamṭha nghal a, an hawi kir tawh lo. Knicks lawmna turin Brunson hliam a na lo a, second quarter laihawlah lo letin a inkhel leh nghal a.

A inhliam hnuah Brunson a ṭha sawt emaw tih tur a ni a, ball kawltu berah ṭangin Spurs-in an ngam lo hle. Brunson hahdam laia an luhtir Jose Alvarado-a'n a hun ṭha neih a chhawr ṭangkai bawk a, minute ruk chhungin point sarih a nei thei. Knicks-in 55-48 in an inthlauhna an tizim a, second quarter tawp dawn Knicks hi inthlahdah lo se hmahruaitu ni chunga halftime hmang thei tur an ni.

Third quarter-ah Spurs an khel ṭha a, Harper leh Stephon Castle ten point an nei zawn nghal. Mahse Spurs kut kal lai a tawp a, point an neih theih lawk loh bakah holam taka ball hloh an ngah. Knicks-in Brunson, Karl Anthony Towns, Landry Shamet leh Miles McBride te hmangin an vaw let a, 76-76 in an nihrual.

Fourth quarter-ah ṭan aṭangin team pahnihte an fimkhur a, inhnehtawk taka an awm laiin Brunson a inlar a, danglamna siamtu a ni. Kum 29 mi Brunson hian a duhtawk ball a khalh kual theih bakah, team-in an mamawh laiin point a score thei a, Spurs-in an dang thei meuh lo. Spurs tan Wemby-a'n chhang let ve mah se a tawk zo lo a, 105-95 in Knicks an chak.

Knicks hian 1973 hnua a vawi khat nan champion leh turin kawng dik an zawh mek a, dinhmun ṭha taka Knicks an din theih nan Brunson-a'n a thawh hlawk hle. American point guard bakah Towns leh Hart te an pawimawh tel a, an champion dawn a nih chuan an inhthlahdah loh bakah, inlehthalna thlen nawn tir thei tur khawpin an huaisen a ngai bawk ang.

Spurs erawh first half-ah khel ṭha mahse an zuih a, an chak loh hi vanduai vang a nih rualin an khelh ṭhat tawk loh vang a ni bawk. Wemby chu second half-ah a bo tluan ṭep a, fourth quarter-ah a inlar leh chauh.

Wemby hian point 26 neiin rebound vawi 12 zet la mah se a team tan a tawk zo lo a, a hahdam laia a aia lut Luke Kornet nen Karl Anthony Towns-a'n a hlau lo a, game 2-ah chak loh nawn an duh lo a nih chuan insiamṭhat an mamawh.