Chhinga Veng an tho chhuak leh nghal

Mizoram Rural Bank Pro Volleyball khelh mekah Nilaini zan khan hmeichhe inelna neih chhunzawm a ni a, Chhinga Veng Spikers chuan 25-17, 25-7, 25-11 (3-0) in Eric Pautu Academy an hneh a, an match hmasa berah chak lo mah se an tho chhuak leh nghal.

PVL hi LPS Arena, Falkland-ah neih a ni a, zaninah hmeichhe inkhel a awm leh nghal dawn a, ITI Veng GSA leh Tuichangral te an inhmachhawn ang. A hmuna inkhel en man hi Rs.50 niin, LPS YouTube channel-ah (member only) a en theih bawk.

Thawhlehna

Inkhel ṭan a nih rualin Anusree Poyili leh Elisian Medai te chu Chhinga Veng tan an langsar nghal a, 8-2 in an team an kal falpui nghal. Eric Pautu Academy tan Agnes Lalthlamuanpuii'n Anusree vuak a dang tla zawn a, Lalruatmawii a khelh ṭhat bawk avangin 14-15 in a inhnaih hman. Mahse an ball hlap a inthlau a, Anusree an dan zui theih loh bakah a kawppui Elisian chuan Spikers point hnuhnung pali a thawk chhuak ve thung a, point riata inthlauin set an la.

Chhinga Veng an khawng chhunzawm a, Eric Pautu Academy-in danglamna siam thei player an neih loh avangin lehlam vuak dan leh lak tumin hun tam zawk an hmang a, an nawr let thei tawh lo. An inkar a zau zui a, player theihna a insan hleih tih a lang a, set hnihna leh thumna belh khawmin Eric Pautu Academy-in point 18 chiah an hmu thei a, harsatna tawk loin Spikers an chak.

Pro Volleyball-a la tel ngai lo hmeichhe team pali an inel a, an inlan hmasak berah Spikers-in India captain ni tawh Anusree an chhawr hman lo. Kum 28 mi Anusree tel hnuah Spikers an ṭha sawt a, vawi 29 a vaw tla a, point kua hloh tel mah se Kuriz Player of the Match a ni nghal.

Mangṭha mai le

Inelna sangah Mizo hlanga khel Eric Pautu Academy player tam zawkin an la tel ngai lo a, player nei ṭha Chhinga Veng an el pha lo. Sarah Lalsuiengi leh Lalruatmawii'n point li hmuin mimala langsar an ni. ITI lakah set thum fai thova an tlawm tawh avangin final luh theih dan kawng an nei tawh lo a, June 8, Thawhṭanni tlaiah Tuichangral nen inkhelin league an khar dawn.