World Cup 2026 Thlirlawkna Group B-ah team intiat tawk - a hmuhnawm dawn

World Cup 2026 khelh hun a hnai zel a, June 11 zanah match hmasa ber khelh a ni dawn - football khawvelah chuan titi dang a leng meuh tawh lo a ni ber.

Hetihrual hian Canada, USA leh Mexico ten an inthlen ṭawm tur inelnaah 'group of death' tia han sawi hluai tur a awm lem lo a, hetihrual hian team intiat tawk tak tak awmna an awm nual - chung zingah chuan group B hi sawi bo theih a ni lo.

A thlengtu branch!

World Cup thlengtu tur zinga mi Canada hi Bayern Munich defender Alphonso Davies captain-na hnuaiah an khel dawn a, an player langsar lo pawh Europe club vantlanga khel an awm nuk avangin, ṭum dang aiin an ṭha zawk a, an tawh a khirh dawn.

Tlarhmaah Juventus forward Jonathan David chu an innghahna a ni dawn a, kum 26 mi David hian World Cup inbuatsaih nan friendly match an khelhah pawh innghahna tlak a nihzia a tilang.

David kawppui turin Tani Oluwaseyi a awm bawk a, Oluwaseyi hi mi hriat hlawh lo mah se season hman zawh takah khan Villarreal tan match 27 a khel pha a, Atletico Madrid chunga a awmpui bakah Champions League khel turin a tlinpui bawk. Oluwaseyi bakah hian Southampton Championship playoff tlinpuitu Cyle Larin a la awm.

An tlarhma playerte thlawp turin Tajon Buchanan an nei a, Villarreal midfielder rinrawl hi a sira khel chi ni mah se an khaipa a nih a rinawm. Buchanan bakah Sassuolo midfielder Ismael Kone a awm bawk a, ani pawh hi Sassuolo midfield luah lumtu niin Canada tan tlarhnung leh tlarhma thlun zawmtu pawimawh a ni ang.

Anni bakah hian Hull City midfielder Liam Millar, Norwich tana khel Ali Ahmed leh Belgian club lian Anderlecht midfielder Nathan Saliba an awm bawk a, player hriat hlawh ni lo mah se an ram leilunga khel tur an nih tel bawk avangin Canada-in eng team mah an hlau bik lo ang.

Tlarhnungah pawh Canada an duai lo a, Celtic right back Alistair Johnson, Marseille tana khel pha Derek Cornelius, Middlesbrough defender Alfie Jones bakah, Fulham defender hmabak êng Luc de Fougerolles te an tlar thei dawn a, Bayern full back Davies-a'n a ho bawk ang. Si ban nghak turin Inter Miami keeper Dayne St Clair a din a rinawm.

Hello Bosnia

May thlatir khan World Cup atana ram ṭhenkhatin preliminary squad an la thehluh chauh laiin, Bosnia and Herzegovina head coach Sergej Barbarez chuan final squad a puang der tawh a, player 26 a koh zingah captain Edin Dzeko a la tel.

Kum 40 mi Dzeko bakah hian, Bosnia-in World Cup an khelh hnuhnung ber, kum 2014-a inlan zingah Arsenal defender hlui Sead Kolasinac chu squad-ah a la tel ve bawk a, kum 32 mi defender hi Serie A club Atalanta tan a la khel mek.

Bosnia tan vawi 148 inlana goal 73 khungtu Dzeko hian top flight football a khel tawh lo a, January khan Serie A club Fiorentina chhuahsanin, German second division club Schalke 04 a zawm a, league match 10 a khelhah goal ruk leh assist vawi thum neiin, Bundesliga khel turin a hruai kai.

Dzeko kum tam deuh tawh mah se, a la ṭha reng a, Bosnia player zingah kum 18 mi Kerim Alajbegovic a tel ve bawk. Red Bull Salzburg player hi Austria lamah a hming a chher viau a, season tharah Bayer Leverkusen a zawm dawn tih a chiang tawh.

Bosnia hian World Cup qualifier-ah Austria tluk loin, an group-ah pahnihna an ni a, mahse, playoff -ah Wales leh Italy chu penalty-a hneh ve ve chungin, World Cup 2026 an inpetkai.

Dzeko thlawp turin Stuttgart forward Ermedin Demirovic, PSV Eindhoven forward Esmir Bajraktarevic leh Borussia Monchengladbach tana goal 13 khungtu Haris Tabakovic a awm dawn bawk avangin, an tlarhmate an zahpuiawm loh.

Midfield-ah Hull City midfielder Amir Hadziahmetovic lo chu player langsar an nei lo a, tlarhnungah erawh club langsar tana khel an ngah a, Arsenal defender hlui Sead Kolasinac, Benfica defender Amar Dedic, Sassuolo defender Tarik Muharemovic leh Lens pahnihna nihpuitu Nidal Celik te an ding tlar dawn.

Asia aiawh Qatar

World Cup hnuhnung ber thlengtu Qatar-in player langsar nei lo mah se, ram pawn player Qatar tana khel thlang an awm nual avangin, qualifier aṭang tawhin Asia aṭanga rinkai zing a mi an ni tawh.

Defender Lucas Mendes, right back Pedro Miguel, winger Edmilson Junior leh striker Mohammed Muntari te chu an pianna ram aia Qatar tana khelh thlang an ni a, Qatar-in an ṭhat phah hle. Anni bakah hian player awm sa zingah Akram Afif leh qualifying a goal 12 khungtu Almoez Ali te chu team dang tan ngaihthah an thiang bik lo ang.

Kum 2022-a an ram ngeia an chet chhiat hnuah, Qatar hi khawvel hmaah an thiamna tak tak fiah turin an lo kir leh a, AFC group-ah hma hruaiin World Cup khel turin an inhlangkai. An group-ah hian thleng sang tura rin hlawh lo ber ni mah se, a vawi hnih nana khel tur an ni tawh a, inelna hnuhnung ber aiin pressure an neih tlem zawk dawn avangin team dang barakhaih thei an ni.

Hei bakah hian Qatar hi Real Madrid coach hlui Julen Lopetegui-a'n a enkawl a, World Cup lo champion tawh Spain lo enkawl tawhtu a nih bakah, inelna sang tak taka tawnhriat nei tawh a nih avangin Qatar player te an inringtawk sawt ang.

Xhaka telna Switzerland

Sunderland midfielder Granit Xhaka-a'n a vawi li nan ram tan captain arm band hreng chungin World Cup a khel dawn a, amah ang thoin Real Betis full back Ricardo Rodriguez pawh a vawi li nan a inlan dawn.

Switzerland manager Murat Yakin chuan Xhaka bakah hian, Premier League aṭangin Nottingham Forest striker Dan Ndoye, Leeds United forward Noah Okafor leh Burnley attacker Zeki Amdouni te pawh a ko a, Amdouni hian hliam vangin tun season-ah league match thum chauh khel mah se, Yakin-a'n a ko ta tho.

Hetihlai hian Switzerland sawi apianga mithlaa lo lang ṭhin Xherdan Shaqiri chu tun World Cup-ah hian ram tan a feh chhuak dawn lo - kum 2010 hnua Swiss team-in Shaqiri tel loa World Cup an hmachhawn hmasak ber tur a ni dawn a, a lunglenthlak hle.

Kum 34 mi Shaqiri hi Swiss Super League lamah FC Basel tan a la hmuhnawm reng a, tun season-ah pawh inelna hrang hrangah match 47 khelin, goal 16 a khungsak a, assist vawi 13 a la nei thei. Mahse Shaqiri hian July 2024 khan ram tan inkhelh a chawlhsan tawh a, a rilru a thlak lo.

Tlarhnungah Inter Milan defender Manuel Akanji chu an kulhpui a ni dawn a, Bundesliga player Aurele Amenda (Eintracht Frankfurt), Nico Elvedi (Borussia Monchengladbach), Luca Jaquez (Stuttgart), Miro Muheim (Hamburg) leh Silvan Widmer (Mainz) te goal venhim hna thawk turin an nei a, an hnungah goal veng turin Borussia Dortmund keeper Gregor Kobel a din theih dawn bawk avangin sang tak thleng turin an ṭha tawk.