Tuichangral beiseina titawptu Sihphir

Mizoram Pro Volleyball League khelh mekah Ningani zan khan, semifinal lut tura beiseina nei Tuichangral chuan set hmasa pahnih an lak hnuah Sihphir an hneh zo lo a, 23-25, 18-25, 25-17, 25-23, 15-8 (3-2) in Sihphirin hnehna changin Tuichangral beiseina an titawp.

LPS Arena, Falkland-ah inelna hi neih a ni a, inkhel en man hi Rs. 50 a ni. A hmuna en thei lo tan LPS YouTube channel-ah (member only) en theih a ni bawk. Zaninah Chhinga Veng Spikers leh Hunthar te an inhmachhawn ang.

Sihphir an huai

Set hmasa pahnihah Tuichangral an chungnung zawk a Rajneesh Singh-a'n ball a vaw hnem hle. Rajneesh hi Saidingpuia Sailo nen an inthlawp ṭha a, Sihphir erawh tihsual an ngah a, Niyas Abdul Salam-a'n a hlap ṭha tawk lo ṭhin. Player insiksawi deuh mah se an khel fuh hleitheih loh avangin set hnih an hloh zawn.

Set hnihnaah pawh Tuichangral an chungnung zawk a, Rajneesh leh Saitea te an khel ṭha chhunzawm a, Sihphirin setter thlakin captain Mesak Malsawmkima luhtir mah se thil awm dan a danglam phah lo. Siphir player Niyas a vuak chu Tuichangralin an dansak thei a, harsatna tawk loin set an la zawn.

Beisei tur nei tawh lo mah se Sihphirin tlawm an duh lo tih an lantir a, set thumna Hmingmawia'n a hma aiin ball a vawrh ṭha a, Niyas chuan a hma aia ṭhain a vua a, Tuichangral rinrawl Rajneesh chuan hlap tlak a harsat ve thung a, beisei loh zawk Sihphirin set thumna an la.

Inrintawkna nen Sihphir an khel zui zel a, set linaah pawh hmahruaitu an ni chho char char. Tuichangralin bei letin, vawi hnih block nei mah se Lalneihpuia Hrahsel chuan set an lak zawnna point a hlawh chhuak.

Sihphirin chak duhna an nei nasa tih a lang a, an phur tulh tulh. Tuichangral erawh an tlahniam zel a, set hnih an hloh hnuah awmze neiin Siphir an nawr let thei tawh lo. Niyas hoin Sihphirin inkhel an thunun a, Niyas hi Kuriz Player of the match-ah thlan zui niin a team a chakpui.

Tuichangral mangṭha le

Set thum faiin Tuichangral chak se semifinal an beiseina a la nung zui thei a, mahse, mar tluan zo loin set thumna aṭangin an zuih ral. League match ruk an khelhah vawi thum Sihphir leh Tuichangralin point sarih ve ve an hmuh bakah an set lak leh hloh a inang chiah a, chak tam zawk Sihphir an sang zawk a, semifinal an lut pha lo ve ve thung.

Tuichangralin Chhinga Veng lakah harsatna lian tak an tawk a, Sri Lanka aṭanga an lak Mahela Indeewar a inhliam. Mahela hliam endik a nih hnuah khel zui zel chi a nih loh avangin an chhawr chhunzawm thei lo. A aiawhtu Rajneesh Singh-a'n Mahela hmun ruak a luah zo lo a, an chak loh chhanah a ngaih theih.