MISMA-in lawmthu sawi

Mizoram State Mixed Martial Arts Association (MISMA) chuan thuchhuah siamin, May 30, Inrinni zana hlawhtling taka Zonet MISMA Fight Night buatsaih a ni thei chu lawmawm an tih thu an sawi a, "R. Dengṭhuama Indoor Stadium leng lo khawpin mipui kan kalkhawm a ni tih kan hria a, MISMA chuan Mizo mipuite chungah lawmthu kan sawi a ni," an ti.

Fight Night hi UFC flyweight champion Joshua Van Bawi Thawng chuan a hmunah a en a, MISMA chuan, "UFC champion lai, India-a rawn zin hmasa ber a ni a, Joshua Van rawn zin hian kan Mizo infiammite nasa takin a cho phur ang tih kan ring," an ti a, fight night hlawhtlin nana puitu Mizoram sorkar chungah lawmthu an sawi bawk.

MISMA chuan, "Mizoram State Sports Council kaltlangin, PMJVK aṭanga puihna kan dawng a, indoor stadium min hmantirin, LESDE leh Tourism dept. in min thawhpui avangin kan lawm hle," an ti a, anmahni puitu hrang hrang hnenah lawmthu an sawi tel.

MISMA chuan, "MMA fans zawng zawng aiawhin kan chief minister Lalduhoma leh sports minister Lalnghinglova Hmar te chungah lawmthu kan sawi a, an hmalakna avangin UFC champion kan lo hmu ve thei a ni," an ti.

Hetihrual hian MMA fans tam takin an duh angin Joshua Van an hmu thei lo a, hemi chungchang hi MISMA chuan sawiin, "Chawlh hman paha rawn kal tel an nih avangin, hun thawl an mamawh a, Mizo MMA fan-te nena inpawhna hun ṭha siam kan tum pawh kan tithei ta lo a ni," tiin ngaihdam an dil.

MISMA chuan, "Zonet thawhpui lo ila, kan event a hlawhtling kher lo ang," tiin Zonet chungah pawh lawmthu an sawi a, MMA-ah chuan Mizo professional fighter an awm nual tawh thu sawiin, "Champion neih ve ngei kan tum," an ti a, Mizo mipui thlawpna an dil nghal.