Group G-a rinkai Belgium, Salah a tel ve

World Cup hnuhnung pathum bakah Euro-a beisei an phak loh hnuah, Belgium chuan kuminah World Cup champion tumin an thawkchhuak leh dawn a, group G-ah rinkai ber an ni.

Mahse, Mohamed Salah awmna Egypt an awm tel ve a, team lian zawk barakhaih thei tura rin Iran leh New Zealand te an awm bawk avangin Belgium hi awlsam taka group stage paltlang tura rin an har

Golden Generation lo deuh

Golden Generation tia an koh zing aṭangin Eden Hazard, Vincent Kompany, Marouane Fellaini, Yannick Carrsaco, Moussa Dembele leh Jan Vertonghen te hun a liam tawh a, Belgium hian top flight league khel phak kawl hnem mah se, an u te angin mipuiin an beisei sang tawh lo.

Si ban nghak turin Real Madrid keeper Thibaut Courtois a la awm thei dawn a, Manchester United tana season duhawm hmangtu Senne Lammens-a'n a nek chhuah a la rinawm loh.

Belgium tan tlarhma lamah Lukaku chu an innghahna a ni dawn a, kum 33 mi striker hi tun season-ah hliam vangin khel tam tawk lo mah se, an ram tana goal khung hnem ber (90) a ni a, ani aia thlan tur an awm bik lo.

Lukaku thlawp turin Manchester City winger Jeremy Doku, Arsenal forward Leandro Trossard te an awm a, mahse Premier League forward pahnihte hi goal khung lamah innghahna chi an nih loh avangin Lukaku mawhphurhna a sang dawn. AC Milan forward Alexis Saelemaekers leh Atalanta forward, Charles de Ketelaere te chu mamawh chhanna an ni thei bawk ang.

Midfielder-ah City midfielder hlui De Bruyne-a'n a la ho thei dawn a, Aston Villa duo Youri Tielemans leh Amadou Onana te nen an inkawp dawn. Veteran midfielder Axel Witsel chu koh zingah a la tel bawk.

Defence chu an panna lai ber a ni a, centre back-a ding tur an chiang lo. AC Milan defender Koni de Winter leh Frankfurt centre back Arthur Theate chu bul ṭan tura rin ber an ni.

Belgium hi an Golden Generation nen khaikhinin an chuai deuh tawh tih a lang a, mahse Egypt, Iran leh New Zealand te zingah chuan chungnung tura rin an ni. Chutihrualin tun hnaia an khelh dan thlirin beisei san an har thung.

Salah nen Egypt

Mohamed Salah-a'n mimal taka a chet ṭhat laiin a ram chu nomawi a la chawipui thei lo a, AFCON-ah ṭum hnih lai final luhpui mah se a vanduai zawkah an ṭang ve ve. Salah hi kumin World Cup-ah Egypt innghahna a ni leh dawn.

Tun season-ah Salah hi Arne Slot nen an intihthiam loh avangin a khel tam tawk lo a, season dang aiin goal pawh a khung tlem zawk. Mahse a thiam ngaiin Salah a thiam reng a, inelna hrang hrangah goal 12 leh assist 10 a nei tling tho a, a la thawhhlawk hle.

Salah bakah hian a kawppui turin Manchester City forward Omar Marmoush a awm bawk a, Aston Villa tan pawha khel tawh Trézéguet an la nei bawk a, Pharaohs innghahna tur an ni.

Kumina khelh zawh tak AFCON-ah khan Egypt hian semifinal-ah Senegal an hneh lo a, pathumna zawnnaah Nigeria chu penalty-ah an ngam lo bawk. Champion tura beisei zingah tel lo mah se, an tawh a khirh dawn.

Buaina karah Iran

World Cup an khel dawn lo emaw tih hnuah, Iran chu inelnaah an tel thei dawn a, football ngainatu tam tak chu Asia team ṭha ber zinga mi an inlan dawn avang hian an lawm hle.

An group match hi USA-a an khelh dawn avangin, Iran player leh staff te an him zawk nan USA border hnaih Tijuana, Mexico-ah an thlentir a, Indo boruak leh World Cup boruak chawhpawlhin Iran an khel dawn.

Iran tana goal khung hnem ber Sardar Azmoun chu koh a ni lo a, politics thila an ram hruaitute a tihlungawiloh vang niin khawthlang chanchinbuten an sawi.

AS Roma tan pawha khel tawh Azmoun hian, Iran leh UAE an intihbuai laiin UAE Vice President nena an thlalak chu instagram-ah a post a, hemi hnu hian an coach Amir Ghalenoei-a'n Azmoun hi a ko leh tawh lo.

Kum 31 mi Azmoun awm lo mah se Olympiakos forward Mehdi Taremi an nei a, Taremi hi Inter Milan leh Porto tan pawha khel tawh a ni a, bul ṭan turin a ṭha tawk. Taremi thlawp turin Brighton & Hove Albion player hlui Alireza Jahanbakhsh a awm bawk.

Iran hian ṭum dang angin player langsar kawl hnem lo mah se, world ranking-ah 21-na an ni pha a, Asia-ah Japan chiah tluk loin pahnihna an nih bawk avangin zuam chi an ni dawn lo.

A hniam ber

Kum 2010 hnua a vawi khat nan New Zealand chu World Cup khel turin an inpetkai a, mahse kumin inelnaah All Whites (New Zealand) hi world ranking-a hniam ber (151) an ni dawn

World Cup an khelh hnuhnung ber khan group stage-ah an khingpuite an inhnetawkpui vek a, 2010 World Cup-a hneh loh nei lo awmchhun ni mah se, an chak loh miau avangin an tla.

All Whites hian Pathianni zan khan friendly match-ah England chu 1-0 in an hneh lo a, friendly ni mah se England laka goal khat chauh an chhuah chu inchhuannna tham a tling.

Nottingham Forest striker Chris Wood chu an hmachhuan ber a ni dawn a, Wood hi an squad zinga World Cup lo khel tawh pahnih zinga pakhat a ni a, defender kum 36 mi Tommy Smith nen 2010 khan squad-ah an awm tawh.