Knicks-in Spurs an hneh nawn

NBA Finals-ah New York Knicks chuan Inrinni zing khan 105-104 in San Antonio Spurs an hneh a, game 2 la lehin best of seven series-ah 2-0 in hma an hruai a, 1973 hnua champion turin dinhmun ṭha takah an awm tawh.

Bul ṭan ṭha Spurs

Frost Bank Center, San Antonio-a inkhelah Spurs-in bul an ṭan ṭha zawk a, De'Aaron Fox leh Julian Champagnie te kut a kal nghal a, Dylan Harper a khelh ṭhat bawk avangin point score lamah harsatna an tawk lo.

Knicks an duai bik lo a, Karl-Anthony Towns leh OG Anunoby ten an chhang let thei zel a, Anunoby-a'n Victor Wembanyama a hlau lo. Mahse Spurs point score a kal tluan avangin 34-25 in an hnufual zawk.

Knicks an tlo

Second quarter-ah Knicks-in hma an sawn a, Towns a khelh ṭhat avangin Spurs-in an 'double team' nghal zel a, mahse Towns an venna lamah Mikal Bridges-a'n hmun awl a ngah phah a, three points a hlah duh lo.

Spurs tana khel ṭha tak Harper chu Anunoby-a'n a block a, Knicks an phur phah hle. Spurs erawh an inthlahdah chhunzawm a, an basket a tan rei avangin 56-52 in Knicks-in an hmahruaina an chhuhsak a, a umtu zawkah ṭangin chawlhlawk an hmang.

Third quarter-ah Spurs an insiamṭha hret a, Wemby hoin Knicks an bei let. Wemby che ṭha mah se Knicks tan Anunoby a khelh ṭhat chhunzawm bakah Jalen Brunson a inlar ṭan a, point an inneih chhawk zak zak hnuah 84-75 in Knicks-in hma an hruai chhunzawm.

Vanduaina

Fourth quarter-ah hmahruaitu Knicks tan Landry Shamet leh Brunson ten point an nei hmasa zawk a, mahse Spurs in theihtawp chhuaha bei letin Wemby leh Harper ten an chhang let.

Wemby-a'n Jose Alvarado leh Brunson te a block chuan Spurs a tiphur sawt a, Stephon Castle-a'n three point lutin minute thum khelh tur la awmah 97-97 in an nihrual.

Team pahnihte inum boruak a san lai takin Spurs an chesual a, second 10 pawh awm tling tawh loah Wemby pass chu inring lo taka awm Castle hnungah a fuh a, Knicks-in chang chhunzawmin Spurs an foul nghal vat.

Brunson chuan free throw vawi hnihah vawi khat chiah a lut. Hun tawp dawnah Wemby-a'n mid range aṭangin vawm mah se a lut lo a, a tlawm zawkah an ṭang nawn.

Engtin zel?

Bul ṭan ṭhat chu a chanve zo tih ni mah se, Spurs tan erawh a ni ve lo. Spurs hian bul ṭan ṭha zawk mah se a tawp an khat ṭha lo a, game laihawla an inthlahdah chu tuar bawkin, point khat lekin an chak lo.

Team pahnihte hi June 9, Thawhlehni zingah an inhmachhawn leh dawn a, Spurs hi an chak lo leh a nih chuan 3-0 in an hnufual tawh zawk dawn a, thawhchhuah leh a har tawh dawn avangin thi leh thau pawlha an ṭan a ngai tawh ang.

Knicks erawh dinhmun ṭha zawkah an ding a, an tan vawi hnih chak a tawk. Chutihrualin Spurs hi champion lai Oklahoma City Thunder hneh theitu an ni a, thlamuang taka awm a la theih loh. Thapui thawha Spurs an khelh tawh dawn avangin an inthlahdah thiang lo.