Germany-in inelna thlengtu US an hneh

Germany-in FIFA World Cup ṭan hmaa friendly match hnuhnung berah inelna thlengtu United States 2-1 in an hneh. Julian Nagelsmann-a hote tan Arsenal chhuanvawr Kai Havertz a vul nghal a, goal hmahruai a khung bakah Leroy Sane chakna goal khung a siamsak bawk.

Pathianni zing khan Chicago-ah United States leh Germany te hi an inkhel a, minute hnihna lekah Joshua Kimmich-a freekick chu Havertz-a'n a tauh lut nghal. Mahse, Mauricio Pochettino hoten minute 37-naah Antonee Robinson hmangin siphurh an sut a, Oliver Baumann dem theih a ni lo Robinson hian a pet kawh ṭha hrim hrim.

Inkhel inhnehtawk takah goal hmaah Germany an hriam hret a, minute 57-naah Havertz-a'n box chhungah rilru fim puin Sane tan ball ṭha a pe a, Galatasaray winger hian chakna goal a khung. Die Mannschaft hian World Cup 2014-ah nomawi chawi mah se inelna hnuhnung pahnihah first round an paltlang zo lo a, Nagelsmann-a hoin an record duhawm loh hi thaichhiat an tum.

Germany hian June 14, Pathianni zan dar 10:30 hian Curacao a hmachhawn dawn a, group E-ah African team ṭha Ivory Coast leh South American team ṭha Ecuador an awm bawk. Inelna thlengtu US hi Paraguay, Australia leh Turkiye te nen group D-ah an awm ho a ni.