Chhinga Veng hnehtu Hunthar an chungnung

Mizoram Rural Bank Pro Volleyball League khelh mekah Inrinni zan khan hmahruaitu Hunthar chuan 16-25, 28-26, 25-16, 25-13 (3-1) in Chhinga Veng Spikers an hneh a, pakhatnaa awm chungin league round an khar.

PVL hi LPS Arena, Falkland-ah khelh niin league round khelh zawh a ni tawh a, June 9, Thawhlehni zan aṭangin semifinal khelh ṭan a ni dawn. Inkhel en man hi Rs. 50 a ni a, LPS YouTube channel-ah (member only) a en theih bawk.

Hunthar an sang

Set hmasa pahnih hloh zawn tura ngaih an nih hnuah Hunthar an tho chhuak a, set hnihnaah 24-21-a hniam zawk an nih hnuah Chhinga Veng nawr betin an insiamṭha leh a, hawi kir tawh loin an a chungnung zawkah an ṭang tluan. Championship kal meka vawi thum chak zawn hmasa ber an nih bakah league match rukah ṭum nga chakin an elpuite lakah an sang fal.

Set hnihna tawp dawnah harh tharna changin Suryansh Tomar chuan vawi 26 vaw tlain point kua a hloh a, a vawi thum nan Kuriz player of the match-a thlan a ni zui. Wilson Lalremruata'n ṭum hnih chiah tisualin point kua a hmu a, Fabian Lallunghnema'n point 11 a thawk chhuak a, point ruk a hloh thung.

Chak lo pawh ni se league-a sang ber ni chungin Hunthar an tlang dawn tho a, mahse an chet ṭha tluang lai an chhawm nung thei. Pahnihna Khawbel aiin point ngain an sang a, point aiin chak a pawimawh zawk avangin pathumna Anastasia Electric Veng nen an inkarah point li a awm a, vawi hnihin an chak hnem zawk.

Spikers tan Vanlalṭanpuia'n point 13 hmuin vawi hnih chiah tisual mah se, a team tan a tawk zo lo a, a tir lama vaw tla thei tak H. Malsawmsanga'n ṭum 11 hlap tlain point sarih a hloh bawk. An chak loh rualin semifinal lut a sang pali zingah Chhinga Veng an hniam ber.

An in tawng leh dawn

Chhinga Veng club hian Hunthar hneh lo mah se a tawpna tur a ni lo a, June 9, Thawhlehni zan hian semifinal-ah an inhmachhawn leh nghal dawn a, Spikers hui an chak loh avanga indawm kun hman an ni lo.

League round tawp zanah Spikers hian set thumna aṭangin beisei an pha lo a, an inkhing tawk lo takzet. Chhinga Vengin vuak tlak an harsat a, player inthlak kual mah se awmzia a nei lo. Set thumnaah point 16 chiah an hmu ve hman a, set linaah che chhe leh zualin point 12-a inthlau chungin Hunthar an tlang.

Spikers tan Hunthar hneh hi thil awlsam a ni dawn lo a, mahse hneh loh nawn erawh an duh dawn lo. Final luh an duh a nih chuan league round-a an hneh lohna theihnghilha, a rang thei ang bera insiamṭhat an mamawh.