India an tlawm leh tawh

Indian Super League zawh hnua international match vawi thum khel tawh India an la chak lo - Blue Tigers hian Zirtawpni zan khan an mikhualna ramah Tajikistan chu 3-1 in an hneh lo a, match thum a zawnin an tlawm ta.

India hian Tajikistan an pan hma hian London khawpuiah Unity Cup an khel a, Jamaica (0-2) leh Zimbabwe (0-1) lakah tlawm ve vein, kut ruakin London an hawsan.

Jamaica leh Zimbabwe ten European football khel player an nei nual a, India tan ram pahnih laka tlawm hi thil zahthlak a ni lo - Tajikistan pawh India ai chuan an la sang hret a, hetihrual hian a zawna vawi thum tlawm erawh mualphona a tling.

Blue Tigers hian rin aia hmain goal an chhuah a, minute kuana lekah Macarton Nickson chuan penalty a chawi a, a pet turin Sheriddin Boboev a lo pen chhuak - harsatna nei loin goal-ah a chantir a, 1-0 a ni.

India tan tlarhmaah Lallianzuala Chhangte, Edmund Lalrindika leh Vikram Partap Singh te an inkawp a, mahse, Bagan player-te Unity Cup aṭanga an inhnuhdawh avanga koh zui an nih loh avangin midfield aṭanga chawmtu an nei ṭha tawk lo.

Mumbai City captain Lallianzuala Chhangtein hun ṭha nei mah se, a vanneih zan a ni lo. Lunglei tlangval shot ṭha tak chu Tajikistan keeper Rustam Yatimov chuan a lo dang hman - kum 27 mi keeper hi Russian Premier League club Rostov tana number 1 keeper a ni.

LZa hian chance dang pawh nei mah se, keeper Yatimov-a hmaah chiah a tauh a, hna harsa a tling lo. Hetihlai hian Edmund Lalrindika pawhin chance duhawm a nei a, mahse, a vanneih zan a ni bik lo.

Akash Mishra siamsak chu Edmund hian ṭha zetin a tauh a, keeper Yatimov-a'n tih theih nei lo mah se, bar a per! India-in si phurh an sut thei lo a, a hnuah hremin an awm zui.

Second half-ah Tajikistan tan Mekhrubon Karimov leh Ehsoni Panshanbe ten goal an khung belh leh a, 3-0 a ni! Minute 89-naah Farukh Choudhary chuan Blue Tigers si phurh sut ṭhen mah se, mualpho zualpui khuhna chauh a ni tawh.

Farukh hian freekick aṭangin India goal awmchhun hi a khung a, freekick hlawh chhuaktu chu Mizo tlangval Edmund Lalrindika a ni. India an tlawm a, player ṭhenkhat tan erawh zan chhinchhiah tlak a ni.

Minute 82-naah Jamshedpur keeper Albino Gomes chuan Gurpreet Singh Sandhu a thlak a, Aizawl FC keeper hlui Albino tan India jersey nena a match hmasa ber a ni - Mizo club lama a pu hlui Khalid Jamil nen an la inzui zel!

Albino bakah hian Punjab FC defender Pramveer Singh leh NorthEast United forward Parthib Gogoi te pawh bench aṭanga luhtir niin, India tan a vawi khat nan an inlan.

India leh Tajikistan te hi June 9, Thawhlehni zanah an inkhel leh dawn a, Khalid-a naute hi an tlawm leh a nih ngat chuan chak nei miah loin an lo haw dawn tihna a ni - thlentir loh hram an duh ang.