Portugal tan Bruno Fernandes

Portugal chuan Inrinni zan khan friendly match-ah Chile 2-1 in an hneh a, Lisbon-a inkhelah result aiin Rafael Leao-a'n Chile defender Ivan Roman a hnek a langsar ta ber.

First half tawp hmain Leao leh Roman te hi hnawhchhuah an ni a, second half-ah player 10 ve vein an khel chhunzawm. Cristiano Ronaldo thlaktu Goncalo Guedes bakah Bruno Fernandes ten Portugal tan an khung a, Chile tan Lucas Cepeda-a'n injury time-ah a khung ve bawk.

Portugal hian first half-ah goal khung lo mah se inkhel an thunun a, chance ṭha pawh an nghah. Ronaldo-a'n chance ṭha a hlah bakah a goal khung pawmsak a ni lo a, Al Nassr striker hi second half-ah lakchhuah a ni.

Minute 58-naah Ruben Neves-a ball fing chu Guedes-a'n box chhungah changin Real Sociedad forward hian ṭha takin a khung. Kum 29 mi Guedes hian season hman zawh takah Sociedad tan match 39 khelin goal kua a khung.

Premier League player of the season Bruno Fernandes-a'n minute 75-naah box pawn aṭangin a pet lut a, World Cup-ah inrintawkna a ngah phah sawt ang. Injury time-ah Cepeda-a'n box pawnah ball a chang a, goal-ah pet thutin Portugal substitute keeper Rui Silva a inring hman lo. Roberto Martínez hote 2-1 in an chak.

Portugal hian June 10, Nilaini zan dar 1:15 hian Nigeria nen friendly match an khel leh dawn. Ronaldo telna team hi group K-ah DR Congo, Uzbekistan leh Colombia te nen awm ho a, group stage paltlang a harsa lo ang.