Argentina khingpui tur Iceland

World champion Argentina-in nomawi humhim tura an match hmasa ber an khelh hmain June 10, Nilaini zing dar 6:30 hian Iceland an hmachhawn dawn. Lionel Messi telna Argentina hian Pathianni khan friendly match-ah Honduras 2-0 in an hneh tawh bawk.

Argentina tan Honduras lakah Lautaro Martinez leh Giuliano Simeone ten goal an khung a, Messi erawh a inlan lo. Inter Miami forward Messi hian a malpuiah hliam tenau a neih avangin a inlan thei lo a, Iceland nena Alabama-a an inkhelh hunah erawh a inlan theih beisei a ni.

Lionel Scaloni hote hian World Cup nomawi an chawi hnuah friendly match khel leh nual tawh mah se team tenau hlir an hmachhawn. Argentina hian kuminah Mauritania (FIFA ranking 115), Zambia (91) leh Honduras (66) te an hmachhawn tawh a, Nilainia an hmachhawn tur Iceland (75) pawh hi World Cup khel lo tur an ni.

Chutihrualin World Cup-ah erawh Argentina khingpui tur an nem a, group J-ah Algeria, Austria leh Jordan te nen an awm ho. Tun hnai friendly match-a team nem an hmachhawn tam avangin team ṭha an hmachhawn hunah Argentina hmabak a hautak lehzual phah tura ngaih a ni.