Real President atan Perez

Spanish club ropui Real Madrid chuan an club President atan president ni lai Florentino Perez bawk an thlang nawn leh ta a, Pathiannia club President thar thlannaah Spanish sumdawng hausa hian vote tla aṭanga 65% ngawt a hui - Enrique Riquelme tan hneh chi a la ni lo.

Perez chuan, "Election-ah hnehna kan chang leh ta a, nomawi kan chawi zel theih nan theihtawp ka chhuah chhunzawm ang. Ka awmna ngaiah ka la awm reng a, Real Madrid humhim turin he hmunah hian ka awm a ni," a ti.

Kum 2009 aṭanga Real President ni tawh Perez hian coach thar turin Jose Mourinho chu contract a ziahpui tawh a, Portuguese coach hian kum thum chhung atan contract hi a ziak. Mahse, Presidential election avangin puan lawk theih a ni lo a, Perez thlan tlin a nih leh takah chuan Mourinho pawh puan thuai a ni ang.

Perez chuan, "Real Madrid-in nomawi a chawi chhunzawm zel theih nan theihtawp kan chhuah chhunzawm dawn a, a vawi 16 nana European Cup kan lak theih nan kan theihtawp kan chhuah zui dawn a ni," a ti.

Kum 79 mi Perez chuan coach atana Mourinho an inrempui tawh thu sawi zuiin, "Santiago Bernabeu Stadium hi chhuang takin a chanchin kan sawi zel dawn a, khawvela player ṭha ber ber kan nei bawk.

"Khawvela coach ṭha ber zinga mi, Madridista dik tak Jose Mourinho kan nei let leh ta bawk. He club President ka nih chhung chu Real hi club member-te ta a ni reng ang," a ti a, club share hralh ṭhen tumna awm anga sawi chu a pha tel.

Perez hian Real President inthlanah khing ngamtu a neih ngai loh avangin, chuhtu awm loin rei tak President a ni tawh a, kum 20 hnua a vawi khat nan Riquelme-a'n khing ngam mah se, Perez bawk a tling nawn leh ta a ni.

Real President thlannaah hian club member 98,272 aṭangin 33,555-in vote an thlak a, Perez hian vote 21,741 hmuin, Riquelme hian 11,814 a hmu thung.