Antonelli tlan pel thei an la awm lo

Formula 1 season kal mekah Mercedes Andrea Kimi Antonelli a che ṭha zel a, Italian driver hian Pathianni zan khan Monaco Grand Prix-ah hnehna a chang a, khum theitu a la nei lo. Antonelli hi a zawna vawi nga a chakna a ni.

Antonelli a ropui

Circuit de Monaco-a intlansiakah Antonelli-a'n bul a ṭan ṭha nghal a, intlansiak chhung zawnga che ṭha tluan zakin midang el phak rual lohin pakhatna a ni leh. A zawna vawi nga a chak thei hi a ropui bakah, a car-ah harsatna a tawh loh avangin a vannei tel bawk.

Kum 19 mi Antonelli hi Monaco GP-a chak thei naupang ber a ni nghal a, a elpui Lewis Hamilton-a record a khum. Hamilton hian 2008 khan kum 23 mi niin Monaco GP-ah hnehna a lo chang tawh a. Hamilton pawhin inelna zawh hnuah Antonelli a lawmpui thiam hle.

Antonelli chuan, "Vawiin chu kan vanneih ni a niin ka hria a, engkim mai kha a tluang thlup a ni. Motor kha a ṭha thlawt a, huai taka tlan chhuak turin inrintawkna leh phurna min pe a ni.

Season a la rei dawn avangin kan hna hi kan la zo lo a, theihtawp kan chhuah chhunzawm reng dawn. Kan tum pawh kan ti sang zel dawn a, hetiang renga tlan chhunzawm hi kan duh dan a ni," a ti.

F1 table-ah Italian driver hian hmahruai chhunzawmin point 156 a hmu tawh a, Hamilton chu pahnihnaah chhoin Antonelli hi point 66-in a phâk lo. Antonelli teammate George Russell chu pathumnaah a tla thung.

Intlansiak chheh vel

Monaco GP-ah hian Ferrari driver Hamilton chu pahnihna a ni a, pathumnaah Red Bull driver Isack Hadjar thlengin a vawi khat podium lawnna a ni. Ferrari driver pakhat zawk Charles Leclerc erawh lap 66-naah a chetsual avangin a tlan tluan thei lo a, an ram leilung ngeia a chet ṭhat loh avangin avangin Leclerc hian a ui khawp ang.

Mercedes driver pakhat zawk George Russell chu 12-na a ni a, mahse point a hmu lo. Russell hian tun season bul a ṭan ṭha a, Australian GP-ah chak nghal mah se beisei a pha lo zui a, a teammate Antonelli a tluk loh avangin Mercedes-ah a nghet lo nia sawi a tam hle.

Hadjar-a'n podium lawn mah se Red Bull lawm a kim lo a, a chhan chu Max Verstappen chu hma takah a chhuah vang a ni. Tun hnaia chanchin ngah tak Verstappen hian intlansiak an ṭan chauh tihah, a car engine-ah buaina a awm avangin a tlan chhunzawm thei lo.

Verstappen hi Canadian GP-ah pathumna a ni a, Monaco sprint race-ah a chet ṭhat avangin Red Bull fans-ten beiseina sang tak nen an thlir. Mahse Verstappen a vanduai a, lap khat pawh a tlan hman lo.

Pathianni zan intlansiakah hian driver pasarih ngawtin a tawp an khar thei lo a, Verstappen leh Leclerc bakah McLaren driver Lando Norris, Haas driver Oliver Bearman leh Aston Martin driver Lance Stroll te an tel.