Feyenoord-in Van Persie an ban

Eredivisie club Feyenoord chuan an manager Robin Van Persie chu inhriatthiam tawnnain a hna aṭanga chawlhtir a ni a, thla 16 chauh a enkawl hnuah Van Persie an ban.

Kum 42 mi Van Persie hian season hman zawh takah khan Feyenoord hi league-ah pahnihnaah a awmpui a, pakhatna PSV Eindhoven chu point 19-in an pha lo a, season tharah Champions League khel turin a tlinpui. Feyenoord tan che chhe lo mah se, club hruaitute chuan kalphung thara kal an duh avangin head coach thar lak an duh a, Van Persie an duh khawp lo.

Feyenoord chuan, "Robin van Persie hian he club tan hian kum khat leh a chanve liam ta chhung khan a theihna zawng zawng a hlan a, season harsa tak karah pahnihna min nihpuia Champions League khel tura min hruai thlen avangin fak a phu.

Mahse club-in uluk takin zirchianna kan nei a, game kan khelh dan kawnga kan hmasawn dan te, Europe leh Eredivisie-a point kan hmuh dan te kan thlir a, season tharah chuan head coach thar neih ṭha kan tih avangin zah tak chungin Van Persie kan thlah liam a ngai ta a ni," tiin thuchhuah an siam.

Arsenal leh Manchester United forward hlui Van Persie hian, football khelh a chawlhsan hnuah May 2021 khan Dick Advocaat-a hnuaiah Feyenoord under 16 team a enkawl a, May 2024-ah senior team a enkawl hmasak ber ni turin Heerenveen a zawm. Thla kaw hnu lawkah Feyenoord a zawm leh a, kum khat leh a chanve a enkawl hman.