Brighton-in Spurs dilna an hnawl nawn

Brighton & Hove Albion chuan Tottenham Hotspur-in an defender Jan Paul van Hecke lei an dilna chu a vawi hnihna atan an hnawl a, Brighton hian an chhiar ang zata dawr ngam an awm loh chuan chhuahtir an tum lo.

Tun season-ah Spurs-in beisei an pha lo a, harsa takin Premier League-ah an inhamtang thei hram. Roberto de Zerbi hoin indin thar an tum mek a, Van Hecke hi an tlarhnung tihkhawng nan an duh.

Spurs hian pound maktaduai 40-in dutch defender hi an dawr a, mahse Brighton chuan an lo hnar. A vawi hnih nan pound maktaduai 45-in dawr leh mah se an ṭanna ngaiah Brighton an ṭang a, an defender rinrawl hi an chhuah dawn a nih chuan pound maktaduai 60 aṭanga 70 an phut.

Kum 26 mi van Hecke hian Seagulls-ah kum khat daih chiah contract a nei tawh a, contract thar a ziak lo a nih chuan a thlawnin a chhuak thei dawn. Hetiang a nih avang hian Spurs hian pawisa tam tham takin an dawr duh lo a, mahse Seagulls lamin a tlem berah pound maktaduai 50 tala hralh an tum.

Kum 2020 khan NAC Breda aṭangin van Hecke hian pound maktaduai hnih lekin Brighton hi a zawm a, loan-a Heerenveen leh Blackburn-ah a chhuah hnuin Brighton tan rinrawl a ni. Spurs hian Dutch defender bakah hian Bournemouth aṭangin Marco Senesi leh Liverpool aṭangin, Andy Robertson te chu free transfer-in an lo lalut tawh a, season tharah chet chhiat an tum tawh lo.