Atletico-in nomawi an hlat tual tual

Spanish La Liga khelh mek-ah Atletico Madrid tan champion beiseina a thamral ṭan mek - Diego Simeone a naute hian Thawhṭanni zan khan Villarreal chu 3-0 in an ngam lo a, league match an khelh hnuhnung pangaa vawi thum an tlawmna a ni tawh.

Season hmasa Champions League finalist hian La Liga table-ah parukna dinhmun luahin hmahruaitu Real Madrid nen vawi 15 league match khelh tawha an inthlauhna chu point 12 zet a ni tawh a, Real leh Barca tan ngaihtuahna tibuai tham an ni ta rih lo.

Inkhel chu

Camp El Madrigal, Villar-real khelmuala inkhelah mikhual team tan Koke chuan minute 19-na lekah post pet per nghal dawp mah se Tiago leh Diego Godin ball inpek sual zar zoin Manu Trigueros chuan chance ngah zawk Yellow Submarine (Villarreal sawina) tan minute 28-naah goal hmahruai a khung nghal.

Atletico-in si phurh sut an mamawh laiin an chesual nawn. Alexandre Pato ball cross-ah Jan Oblak a chesual a, Slovenian goalkeeper chetsual nangchingtu Jona-than dos Santos chuan minute 38-naah an goal hnihna a khung a, keeper Oblak a inhliam zui bawk.

Villarreal tlarhnung an in-rem fuh a, Atletico tlarhmaa inkawp pathum Angel Correa, Kevin Gameiro leh Antoine Griezmann ten hun ṭha an nei thei meuh lo. Injury time-a ni a, goal khungtu chu Villarreal bawk an ni. Roberto Soriano chuan Alfred N'Diaye nen mawi taka ball an inpek kual hnuah Atletico mualphona belhchhah turin an goal thumna hi a khung ve leh a ni.

Khawiah nge Griezmann?

Ballon d'Or 2016-ah meuh pathumna ni mah se Antoine Griezmann-a'n La Liga duhawm lo tak a hmang mek - minute 679 chhung chu league match-ah goal a khung ta lo. French forward hian La Liga-ah goal ruk khung tawh mah se a league match hnuhnung pariatah goal a khung tawh lo a, a goal khung lohna Sevilla, Real Sociedad, Real Madrid leh Villarreal an hmachhawnna inkhelah an la tlawm vek zui!

Atletico-in Inrinniah Las Palmas an hmachhawn leh dawn a, Simeone-a naute tan harhtharna chang turin season hmasa inelna hrang hranga goal 32 khungtu Griezmann chet ṭhat a pawimawh ang.

Oblak-a inhliam

Atletico Madrid an che fuh hleithei lo a, an manganna belhchhah turin goalkeeper Jan Oblak a inhliam! Atletico Madrid coach Diego Simeone chuan, "Villarreal hneh loh ai pawha pawi zawk chu Oblak inhliam hi a ni. Hliam na tak a nih loh ka beisei," tiin a sawi.

Slovenian goalkeeper Jan Oblak hi chawlhlawk hmain a hliam vang hian lak chhuah a ni a, second choice goalkeeper Miguel Ángel Moyà chuan kum 23-a upa keeper hmun ruak hi luahin goal a ven a ngaih phah.