Chawlh tum lo Mary Kom
MC Mary Kom chuan infiamna khaw-vel mangṭha mai a la tum lo. Manipur boxer hian kum thum emaw kum li chhung vel inhnek a la duh thu leh 2018 Asian leh Commonwealth Games-a inlan te chu a thil tum pawimawh hmasa a nih thu a sawi a, hei mai bak--ah hian Tokyo Olym-pic pawh dah ṭhat ngawt theih a la nih loh thu a sawi tel bawk.
Kum 33-a upa Mary Kom chuan, "Kum thum emaw kum li chhung emaw vel chu inkhelh leh theih ka duh a, Tokyo Olympic-ah hian light flyweight (48kg division) an telh dawn a nih chuan he inelna huangah hian kan ram tan gold medal lak theih ngei ka duh a ni," tiin a sawi.
World champion vawi nga ni tawh Mary Kom hi 2012 Summer Olympics-ah khan India hmeichhe boxer zingah amah chiah hi inlan turin a tling a, hemi ṭum hian flyweight (51 kg) category-ah bronze medal a la.
Mary Kom chuan sawi chhun-zawmin, "Parliament session vangin tun hnaiah boxing ka khel tam lo a, tunah chuan ṭha takin training ka nei leh tawh. Ka thil tum hmasa chu 2018 Asian leh Commonwealth Games-a India tana medal lak a ni," a ti. Kumin April 26 khan India president chuan Mary hi Rajya Sabha member atan a lo ruat tawh a ni.
London Olympic silver medalist hian India hmeichhe boxer ten hma an sawn theih nan theihtawpin hma a la. Mary Kom Regional Boxing Foundation (MKRBF) din tawhin tunah hian chak zawka hma an lak theih nan Petroleum Sports Promotion Board (PSPB) nen in-remna an siam leh tawh bawk.
Mary Kom chuan, "PSPB hian kum nga chhungin cheng nuai 75 min pe dawn a, hei bakah hian SAI chuan NDSF (National Sports Development Fund) aṭangin hmun-hma ṭha kan neih theih nan vaibelchhe hnih min pe bawk. Hei hian hmeichhe boxer te tan hma-sawnna a thlen theih ngei ka beisei," a ti.
Manipuri boxer Mary Kom chuan sawi chhunzawmin, "Hmeichhe boxing hian ngaihven a hlawh chho zel a, he infiamna hmang hian khawvel hmuhah kan ram hi tih hmingṭhat ka duh. Hmunhma ṭha tak kan nei chho zel a, he lai hmun aṭanga national champion mai ni lo, international champion neih ngei hi kan thil tum pakhat a ni," tiin a sawi.