Milan chungah Roma

Thawhṭanni zan Italian Serie A inkhelah AS Roma chuan an mi-khual AC Milan 1-0 in an hneh. Season hma-saa pathumna Roma hian point 35 hmuin hmahruaitu Juventus nen an inthlauhna chu point li a ni mek - Inrinni zanah league table chunga awm pahnih hi an inhmachhawn ang.

Stadio Olimpico-a inkhelah Roma hian hliam vangin Francesco Totti leh Mohamed Salah te an chhawr thei lo. Milan-in goal khung theihna hun ṭha an nei hmasa a, M'Baye Niang-a penalty chhuih chu Arsenal aṭanga loan hmanga Roma zawmtu keeper Wojciech Szczesny-a'n a dan sak.

Second half-ah Roma tan midfielder Radja Nainggolan a inlar. Bel-gium international hian chak taka ball a tlan pui hnuah yard 20-a hla aṭangin minute 62-naah he inkhela goal awm chhun leh chakna goal ni bawk chu a khung. Roma hian an mahni khelmualah a zawnin match nga chhung hnehna an chang ta a, league table-ah an hnuai chiah awm Milan hi point thumin an kal pel rih.

AC Milan coach Vin-cenzo Montella chuan, "Kan khel chhe lo a, point kan hmuh loh vang erawh chuan kan vanduai thung. Kan thil tum hmasa chu Europa League khelh a ni a, chumi tur chuan inkhelh lehpekah kan insiamṭhat nghal a ngai ang. He club hi kum thum chhung vel Europe-ah a inlan lo tawh a, hei vang hian thil tam takah harsatna a awm - champion tur phei chuan zir tur leh hmabak kan la ngah hle," a ti. Montella hi player a nih laiin Roma tan hian kum 10 chhung zet a lo khel tawh.

Roma coach Lucia-no Spalletti chuan, "Kumin-ah Milan hian hma an sawn nasa hle a, zaninah pawh khan kan tan khelh an harsa takzet. Chutih rualin inkhel hautakah pawh hnehna chang turin kan ṭha tawk tih a lang. Tunah chuan league hma-hruaitu Juventus hma-chhawn turin kan in-buat-saih zui ang, chetsual a thiang lo," tiin a sawi.

Inkhel dangah Fio-rentina chuan Nikola Kali-nic goal hnih hmang-in Sassuolo 2-1 in an hneh a, point 26 hmuin league table-ah pasarihna an ni.