2016 FIFA Club World Cup Vawiin tlaiah South American champion
FIFA hnuaia khawmualpui hrang hranga club inelnaa champion-te inelna Club World Cup semifinal chu vawiin aṭangin khelh ṭan a ni dawn. Copa Libertadores champion Atletico Nacional leh inelna thlengtu Japan club Kashima Antlers te vawiin tlai dar 4:00 hian an inhmachhawn ang.
Inelna kalphung
FIFA Club World Cup-ah hian khawmualpui paruka champion te bakah inelna thlengtu ram champion an tel bawk. South American leh European champion te semifinal aṭangin an tel ṭan chauh a, hei hi inelnaa sulhnu an neih ṭhat vang a ni.
Kumin hian J1 League cham-pion Kashima Antlers-in playoff-ah OFC Champions League champion Auckland City chu 2-0 in an hneh a, quarterfinal an lut. Inelna thlengtu Antlers hian semifinal lut turin CAF Champions League (Africa) champion Mamelodi Sundowns chu 2-0 bawkin an hneh.
Quarterfinal pakhat zawkah CONCACAF Champions League champion América chuan AFC Champions League champion Jeonbuk Hyundai Motors chu 2-1 in an hneh a, Mexican club América hian Ni-nga-ni tlaiah European cham-pion Real Madrid a hmachhawn ang.
Semifinal chu
Atletico Nacional hi tun hnaia an hming lansarhna chu Copa Sudamericana Final-a (Europa League tlukpui) Bra-zi-lian club Chapecoense hmachhawn tur an nihna kha a ni. Copa Colombia champion Atletico hian Brazilian club thlawhtheihna chetsualna vanga final hmachhawn thei lo Chapecoense hnenah Copa Sudamericana nomawi hlan mah se South America rama inelna sang ber Copa Libertadores-ah an champion tho avangin Japan rama zin theihna an nei.
Colombian club Atletico hian 1989 Intercontinental Cup-ah AC Milan chu extra time-ah an hneh lo a, hei vang hian khawvel huap inelnaah nomawi an la chawi lo. Atletico Nacional coach Reinaldo Rueda chuan, "Colombian team hian kan rilru put hmang kan thlak ṭan a, kan huaisen tawh. Chutihrualin Kashima hian khelh dan bik an nei a, an ran bawk avangin hnehna chang tur chuan hun tawp ham rik hma theihtawp kan chhuah a ngai ang," tiin chak chiang saah a indah loh thu a sawi.
Kashima Antlers coach Masatada Ishii chuan, "Atletico Nacional khel hi vawi khat chiah ka la hmu. Ka sawi theih chu South American team chuan theihna sang tak an nei a, anni ang team ṭha hneh thei tur chuan kan ṭhat theih dan bera kan khelh chhuah a ṭul dawn a ni," tiin an hmabak a khirh thu a sawi.