Ballon d'Or 2016 Messi chunga leng Ronaldo

Kum 2016 chhungin khaw-velah Cristiano Ronaldo aia football thiam an awm lo - Real Madrid forward hi Thawhṭanni zan khan Ballon d'Or 2016 chawimawina pek a ni a, Lionel Messi leh Antoine Griezmann ten an tluk lo.

Kum 31-a upa Ronaldo-a'n Ballon d'Or chawimawina vawi li a dawng tawh a, vawi nga dawng tawhtu Messi chu a tluk loh awmchhun a ni. Kum 2009 hnuah player ropui pahnih hian Ballon d'Or hi an indawn chhawk a ni ber a, 2008, 2013, 2014 leh 2016-ah Ronaldo-a'n dawngin a bak kumah zawng Messi-a'n a dawng thung.

Ronaldo a lawm

Portugal captain Ronaldo-a'n Euro 2016-ah goal thum khungin an ram a champion pui a, Champions League-ah Real Madrid chu nomawi a chawipui bawk. Portuguese forward chuan, "Ballon d'Or hi vawi li lai ka dawng ang tih hi ka suangtuah phak ngai lo. Zaninah hian ka in-chhuangin ka hlim takzet a ni," a ti.

Manchester United forward hlui chuan sawi chhunzawmin, "Real Madrid leh ram tana ka khelh-pui ka ṭhiante hnenah lawm-thu ka sawi a, he chawi-mawina ka dawn theihna tura min puitu ka ṭhian leh mipuite chungah lawmthu ka sawi a ni," tiin a hlim hle.

Kum ṭha

Ronaldo-a'n season kal mekah ram leh club tan match 20 khelin goal 19 a khung leh der tawh a, kum 2016 bikah match 42 khela goal 38 khungin assist vawi 14 a nei. Kuminah La Liga match 30 khel tawhin goal 39-ah a inrawlh - vawi 31 khungin assist pakua a nei.

Kumin chhungin Europe-a league sang zual panga a goal 10 khung tlin chinah Ronaldo hi minutes-per-goal rate nei ṭha pathumna a ni. Monaco striker Radamel Falcao chu minute 59.6 dana goal khung ang niin pakhatna a ni a, pahnihna Luis Suarez chu minute 82.57 dana goal khung ang niin Ronaldo hi minute 83.6 dana goal khung ang a ni thung.

I ti ṭha e Messi

Lionel Messi-a'n pahnihna dinhmun luahin Ronaldo phak lo mah se kum ṭha tak a hmang tih hi hai theih a ni chuang lo. Argentine forward hian season hman zawh takah Barcelona chu La Liga nomawi a chawipui a, kuminah inelna hrang hrangah match 50 khelin goal 50 a khung tawh! Argentina-in Copa America final an luh nan goal nga khung mah se final-ah penalty chhuih lut loin an tlawm thung.

Barcelona player zingah Luis Suarez chuan Atletico Madrid forward Griezmann tluk loin plaina a ni a, Brazil captain Ney-mar chu pangana niin Wales for-ward Gareth Bale chu parukna a ni.

Premier League

Mizote ngaihven Premier League aṭangin player pariat chu hming chhawpchhuah 30 zingah an tel a, an zinga pathum chu top 17-ah an lang phak. Leicester City striker Jamie Vardy chu pariatna a ni a, PFA Player of the Year Riyad Mahrez chu BBC African Footballer of the Year chawimawina a dawn niah hian pasarihna a ni.

Swedish striker Zlatan Ibrahi-movic chu 13-na niin khawvela player manto ber Paul Pogba chu 14-na a ni a, Manchester City duo Sergio Aguero leh Kevin de Bruyne bakah Tottenham goalkeeper Hugo Lloris-te chu player 30 zinga tel, top 17-a lang phak lo zinga mi an ni thung.