Klopp-a'n Neville a tham lo

Liverpool manager Jurgen Klopp chuan Manchester United legend Gary Neville chu TV pundit ni turin eng ang chiaha ṭha nge a nih inzawt turin a ti!

Reds goalkeeper Loris Karius-a'n an match hnuhnung pahnihah tihsual a neih avangin Liverpool-in Bournemouth an hneh loh bakah West Ham an inhnehtawkpui a, Neville hian German keeper hi sawiselin a unaupa Phil Neville chuan a u ngaihdan hi a ṭawmpui ve bawk.

Klopp chuan a keeper chhanin, "Gary hi player enkawl chi a nih loh zia chu kan hmu vek tawh a, TV hmaa player-te khelh dan chungchang lo sawi tur hian tu nge a nih?," tiin a kap na hle. England defender hlui hian Valencia chu match 28 chiah a enkawl hman tihin March thla khan ban a ni a, Klopp chuan hei hi kam tam ve tak Neville kah let nan a hmang.

German coach chuan Valencia-in an ban hnua Sky Sports lama pundit ni tura kir leh Neville chungchang sawi chhunzawmin, "Pundit ṭhenkhat, a tam zawk football player-te hian sawisel nih hrehawmzia hi an theihnghilh a ni. A bik takin Neville unau hian nungchang an hre lo a, a u zawk reilote manager lo ni ve tawh phei hi chuan sawiselna hian eng hna ṭha mah a thawk lo tih hi chu a hre tur a ni," a ti.

Dortmund boss hlui chuan sawi chhunzawmin, "Neville hian Liverpool player ṭhatna chu sawi a chak lo ang tih a chiang a, chu chuan a thusawiin awmzia a neih lohzia a tilang chiang hle a ni. Neville unau hian Liverpool an ngaina lo tih zep rual a ni lo. Engpawhnise, min chhang duh a nih chuan twitter ni loah min chhang rawh se, ka awm ve lohna social media lama in chhan hi ka ngaihtuah hman lo," tiin amah an chhanlet dan tur nen a hrilh thlap!

Gary Neville hian twitter lamah Klopp hi a chhang tho a, "Haha. Eirawngbawl thiam tak ka ni lo a ni mai thei a, mah se sa tui chi chu ka hre ve a ni," tiin manager angin hlawhchham mah se player ṭha a hriat thu a sawi.

Liverpool hian zanin dar 1:15-ah Premier League match khel turin Middlesbrough an lenchilh ang.