Didika hoin ISL final-ah ATK

Atletico de Kolkata leh Mum-bai City te goal khung loin an inhnehtawk a, Mizo tlangval Lalrindika Ralte leh Robert Lalthlamuana te khelhna Kolkata club-in final an lut. Semifinal first leg-ah ATK-in 3-2 a hnehna an chan avangin inkhel pahnih belh-khawmah an chungnung zawk.

Mumbai Football Arena-a inkhelah mualneitu club-in beisei an phak lo a, hrem vanga Diego Forlan inlan theih loh zana an innghahna Sunil Chhetri a 'nil' tluan chhuak zak bawk. Kolkata club tan Robert Lalthlamuana'n inkhel bul ṭan mah se Khawzawl tlangval hi minute 43-naah a yellow card pahnihna avanga hnawhchhuah a ni - final a khel thei dawn lo.

Rin loh takin ATK coach Jose Molina-a'n a player pawimawh rual Helder Postiga, Iain Hume, Sameehg Doutie leh Didika te bench-ah a dah a, Lunglei tlangval erawh a aia lut Bidyananda Singh inhliam vangin chawlhlawk hma-in khelmual chhungah a inlan leh ta tho - I League lama East Bengal winger hian goal khung theihna hun ṭha vawi thum lai nei mah se goal-ah chantir thei lo thung.

Mumbai tan Lalhmangaih-sanga Ralte chu ṭum dang ang bawkin inlan mah se season hmasaa Chennaiyin champion puitu North Mualcheng tlangval hian a season zawnin nomawi a chawi thei dawn ta bik lo.

Buaina karah Didika

Minute 90 chhunga goal a luh loh avangin inkhel hmasaa chak zawk ATK-in final an lut a, inkhelh hun tawp ham rik a rik rualin buaina a chhuak. ATK striker Juan Belencoso leh Mumbai City striker Thiago Cunha te chu red card pek ve ve an ni.

Buaina karah Mizo tlangval Didika hmel hmuh tur a awm a, India tana vawi 14 inlan tawh winger chuan, "Buaina a chhuah rual khan ṭhelh turin ka tlan phei a, Mumbai player-te kha ka rin aia an lo thinrim avangin tum loh deuhin buainaah ka va inbarh lut ve ta a ni," tiin Vanglaini palai hnenah buaina thlen dan a sawi.

ISL season hmasa pahniha Mumbai City player Didika chuan sawi chhunzawmin, "Mumbai tana ka khelh lai pawhin ATK hi chu kan haw ṭhin a, club neitu te ve sumdawnna lama inhal vanga he boruak hi awm niin ka hria. ISL 1 match hmasa berah khan ATK hi 3-0 ngawtin kan ngam lo a, goal khungtu Fikru khan ngeiawm takin a goal khung a lawm bawk. Kha ta ṭang khan team pahnih boruak a fuh thei tawh lo," a ti.

Champion beisei

Lunglei tlangval chuan final inkhel tur thlirlawkin, "Final khelhna tur hmun hi Kochi khawpui a ni a, fans an tamin an bengchheng ṭhin si a, inkhelh a har ṭhin takzet. Khelmual chhungah pawh kan in ko hleithei ṭhin lo a, game harsa tak a ni dawn," tiin Vanglaini palai a hrilh.

Kochi khawpuiah Didika'n inkhelh harsa ti mah se champion a beisei loh phah chuang lo. Churchill Brothers-a a I League career ṭantu chuan, "ISL-ah chuan team tin kan intluk tawk avangin rinthiam a harsa a, nomawi chawi ngei erawh ka beisei," tiin a sawi.

Mimal Lawmman

Emerging Player of the Match Pritam Kotal, Atlético de Kolkata

Hero of the Match Javi Lara, Atlético de Kolkata