Mizo club an mualpho Final-ah Rajputana Rifles Vs ARC

Mizote leh sipai inkara inṭhian-ṭhat nana buatsaih basketball inelna Governor's Cup final-ah tualchhung club tan hmun a awm lo. Zanin dar 6:00 hian Hawla Indoor Stadium-ah closing ceremony neih a ni ang a, Rajputana Rifles leh Assam Regimental Centre (ARC) ten final an khel zui nghal ang. Tlai dar 3:00-ah Mizoram Super League champion Khatla TBL leh Zarkawt Serpents ten pathumna an inchuh ang.

Mualphona

MSL awm hnuah tualchhung club-te'n Mizoramah fiahna an la tawk lo a, season hnih khelh zawh hnuah bukin an awm a, an tling zo lo.

Governors Cup-ah MSL2-a semifinal lut pha chin Khatla TBL, Tuikual South, Mission Veng Vikings leh Zarkawt Serpents te Mizo aiawhin an tel a, group hnihah pahnih ve ve a sem darh an ni. Vikings-in group stage-ah 2016 MBBA Cup champion Tuikual South hneh mah se Rajputana leh ARC hneh loin knockout stage an lut zo lo a, MSL2 finalist Tuikual South-in point an hmu lo.

Group A-ah Khatla TBL leh Zarkawt Serpents ten Assam Rifles leh Rajput Regiment an sawp ve ve a, MSL club pahnih inkhelah Serpents-in TBL chu 74-73 a hneh hramin Zarkawt club hi group hmahruaitu an ni.

Mizo club leh state pawn club pahnih ve vein semifinal an lut a, Thawhlehni zanah Assam Regimental Centre (ARC)-in Serpents chu 72-67 a an hneh bakah Rajputana Rifles-in Khatla TBL chu 82 - 55 in an sawp bawk. MSL champion TBL-in ṭum dang an phak lo tih a hmuh theih a, chutihrualin point 27 zeta an chak loh avangin khelh ṭhat ṭumah pawh an chak a rinawm chuang loh.

Rajputana Rifles hian group stage-ah Vikings 100 - 66 a an sawp bakah Tuikual South chu 84 -67 zetin an hneh bawk. Mizo club tana mualphona belhchhahtu chu Rajputana hian an ṭhat dan berin Mizoram an rawn pan lo. Mizo player-te'n mimal thiamnaah nasa takin hma sawn mah se fitness leh teamwork-ah hmasawnna tur a tam hle.

Inkhel en a ṭha

Match li khelh tawha la chak vek Rajputana Rifles hi champion tura rinkai an ni a, group stage-ah final-a an hmachhawn tur ARC hi 80-70 in an hneh tawh. Chutihrualin ARC hian Mizo player an kawl a, hnam dang player nen a mawi tawka inchawh pawlh an nih bawk avangin final-ah beisei loh result a thleng thei bawk.

Mizo basetball khel ṭhin tan erawh final hi hmaih chi a ni lo a, hmasawn duh tan chuan en ngei ngei tur zawk a ni. Mizo club an hmachhawnte hneh vektu team pahnih aṭang hian inzirna tur tam tak a awm ngei ang.