Sawmfela - nomawi nge mimal lawmawm?
Mizoram Premier League Season 5-ah final chiah khelh tur a awm tawh a, top scorer tur a la chiang thei lo. Chanmari FC forward Malsawmfela leh Chanmari West FC captain Laldampuia ten goal 11 ve an khung tawh.
Top Scorer
MPL season khat chhunga goal khung tam ber chu top scorer a ni a, player pakhat hnenah chauh lawmman hi pek ṭhin a nih avangin goal khung zat inang an awm a nih chuan tehfung dang duan a ni.
Goal khung zat inang an awm a nih chuan match khelh tlem zawk hnehah lawmman pek tur a ni a, an match khelh zat a inân fo chuan field chhunga minute hmang tlem zawk chu top scorer a thlan tur a ni. Tehfung pahnih en hnu pawha top scorer tur thlan fel theih a la nih loh chuan player disciplinary record en tur a ni.
MPL3-ah khan Chanmari forward Sawmfela hian goal kua a khung a, amaherawhchu goal kaw khung tura match mamawh tlem zawk Mizoram Police win-ger Lalbiakhlua hnenah top scorer lawmman a pek a ni. Ram---hlun South tlangval hian MPL best forward chawimawina dawng tawh mah se top scorer chawimawina a la dawng lo.
Player dinhmun
Chanmari forward Malsawm-fela hian MPL5 match hmasa bera Dinthar FC an hmachhawn ṭumin inhliam vangin a inlan thei lo a, a bak match 15 chhung chu starting eleven-ah chang fai vekin match liah chiah a khel tluan lo. Ramhlun South tlangval hi an thlak ṭum pawhin minute 80 hmaa lakchhuah an ni ngai lo a, MPL5-ah minute 1326 inlanin match tinah minute 88.4 khel ang a ni.
Laldampuia erawh Chanmari West match 16-ah inlan kim vek a, vawi 14 a khel tluan bawk. Kawrtethawveng tlangval hi minute 1404 a inlan tawh a, match tina minute 87.75 khel ang a ni. West Warrior captain Dampuia hi khel dawn tawh lo mah se Sawmfela'n final a khelh chiah hian an khelh zat a inang dawn a, top scorer ni thei a la ni.
Minute 78
Final-ah Sawmfela hi minute 78 hmaa lakchhuah a nih chuan goal pawh khung lo mah se top scorer a ni ang. Amaherawhchu Dampuia aia discplinary record nei chhe zawk Sawmfela hian goal khung si lo a minute 78 a khelh tlin chuan top scorer a chan ang.
Ramhlun South tlangval hian final-a minute 78 a khelh chiahin Dampuia nen an minute khelh zat a inang dawn tihna a ni a, hei hian nomawi inchuhna a ti ngaihnawm sawt ang.